11.9.2020 | 07:15
Tvær greinar og báðar góðar.
Þeir skrifa báðir greinar í Morgunblað dagsins (11.9.2020) Benedikt Jóhannesson og Vilhjálmur Bjarnason.
Benedikt segir ríkisstjórnina vera örláta á almannafé og svo sannarlega er hægt að taka undir það.
Hann nefnir fjölmiðlastyrkveitingar sem fóru talsvert öðruvísi en margir höfðu ætlað að yrði, þar sem ,,flutu hundruð milljóna til fjölmiðla í einkaeigu" og bætir við:
,,Það er gaman að vera örlátur á almannafé. Flokkarnir tóku strax í upphafi samstarfsins þá snjöllu ákvörðun að spreða peningum úr vel stæðum sjóðum almennings í góðærinu. Ég er búinn að gleyma því hvar í hagfræðibókunum það stendur að ríkissjóður eigi að vera í mínus þegar vel árar, en stjórninni tókst það í hagvextinum í fyrra."
Bendir síðan á að bændur séu launalægsta stétt landsins og segist hafa rætt málin við fyrrverandi formann Bændasamtakanna og hafi lagt til að: ,,sauðfjárbændur fengju peninga beint og mættu ráða því hvaða búskap þeir stunduðu. Fengju jafnvel greiðslur fyrir að hætta búskap enda offramleiðsla í gangi."
Þetta mun formanninum ekki hafa þótt góð speki og sagðist þurfa að hugsa um hag sauðfjárræktarinnar. Af því má draga þá ályktun að sauðfjárræktin sjálf hafi verið meira virði í huga formannsins en hagur þeirra sem búgreinina stunduðu!
Síðar snýr hann sér að útgerðinni og segir eftirfarandi:
,,Sumir vinir mínir réttlæta gjöf ríkisins til útgerðarmanna með því að þeir séu svo duglegir og nefna þekkt hörkutól. Mikið væri gaman að sjá þessa félaga mína handvelja þann hluta þjóðarinnar sem á skilið að fá sérstaka umbun frá ríkinu fyrir dugnað. Ríkisstjórnin myndi fagna þeim liðsauka."
Bætir síðan við:
,,Sagt er að enginn sinni því sem allir eiga. Það er ábyrgðarhluti að vera vörslumaður almannafjár. En auðvitað er miklu skemmtilegra að eyða allra fé."
Vilhjálmur Bjarnason vitnar í gaura sem undirrituðum eru óþekktir, enda ekki innvígður í viðskiptafræðina og fyrirsögn greinar hans er ,,Modigliani & Miller".
Eftir að hafa farið vítt yfir í skemmtilegri grein, þar sem reynt er að skýra í stuttu máli að stundum getur verið nauðsynlegt að styðja við kerfislega mikilvæg fyrirtæki eins og til að mynda Icelandair lýkur hann grein sinni með þessum orðum:
,,Ríkisábyrgð á lánum er reikningsdæmi. Stærðfræði er aungri námsgrein lík. Að reikna, það er eins og að sjá sólina koma upp mörgum sinnum á dag."
Við tökum undir það og bætum í jöfnuna frétt sem lesa má í Morgunblaðinu í dag, þar sem greinir frá því að:
,,Krafa var lögð fram í gær í Héraðsdómi Reykjaness þar sem farið var fram á gjaldþrotaskipti flugfélagsins Play."
Sumir hafa tjáð sig á þann veg í umræðunni að undanförnu að stofnun flugfélags sé ámóta verkefni eins og að snýta sér úr nös.
Vitanlega er svo ekki og mættu margir sem látið hafa vaða á súðum hvað það varðar hugsa sinn gang.
Á það jafnt við óbreytta, sem forystumenn verkalýðsfélaga og ýmsa aðra.
Flokkur: Stjórnmál og samfélag | Facebook
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.