Á eða á ekki að virkja neðri Þjórsá?

Virkjun Þjórsár 

  Í Morgunblaðinu 4. september síðastliðinn er birt grein eftir þá Ólaf Sigurjónsson og Guðfinn Jakobsson þar sem þeir taka til umfjöllunar áform Landsvirkjunar um virkjanir í neðri hluta Þjórsár.

  Svo er að skilja að þeir félagar hafi talsverðar áhyggjur af fjárhag fyrirtækisins og telji það þess ekki umkomið að vinna að undirbúningi virkjanaframkvæmda á svæðinu sem þeir segjast raunar vona að ekki verði af. Í framhaldinu víkja þeir að skipulagsmálum sveitarfélaganna sem að ánni liggja og telja þau vera óljós. Þá virðast þeir vilja leggja það til að sótt verði um framlag til ríkissjóðs til að „verjast ágangi Landsvirkjunar”. Hlýtur það að teljast fremur frumleg hugmynd, að ætlast til að ríkissjóður, svo illa á sig kominn sem hann er, fari að eyða fjármunum í að vinna gegn áformum fyrirtækis, sem að mestu leyti er í eigu ríkisins. Áformum um að ráðast í einhverjar þær hagkvæmustu og sjálfsögðustu virkjanir sem hægt er að ráðast í, ef á annað borð er einhver framtíð í raforkuvinnslu í landinu. Það að þeir félagar hafi áhyggjur af fjárhag fyrirtækisins á þann hátt sem þeir leggja upp með er vægast sagt furðulegt. Þegar flestir hafa eðlilegar áhyggjur af stöðu ríkissjóðs og helstu fyrirtækja landsins, þá þykir þeim verst að innan fyrirtækisins ríki framfarahugur og að horft sé til framtíðar.

  Framhald greinarinnar byggist síðan á því að gefa ýmislegt í skin og láta að því liggja að óeðlilega hafi verið staðið að málum í undirbúningsvinnu þeirri sem fram fór af hálfu sveitarfélaganna sem liggja að Þjórsá. Slíkur málflutningur dæmir sig að sjálfsögðu sjálfur og getur ekki talist gott innlegg í umræðuna, nema tilgangurinn sé að draga hana niður á það plan, að sem allra fæstir vilji þar að koma.                           

  Greinarhöfundar koma síðan fram með þá frómu ósk að Vinstri hreyfingin grænt framboð líði undir lok af þessu öllu saman, ef hún stöðvi ekki fyrirhugaðar virkjanir og kemur ekki á óvart að þeir félagar hyggist sækja sér styrk í þá átt. Að sjálfsögðu sækja þeir kraftinn þangað sem hann er mestur og framsýnin mest og er það vel, þar eiga þeir eflaust heima og ekki er að efa að styrkur þeirra muni nýtast vel í þeim herbúðum.

  Svo er að skilja af þeim félögum, að slæm staða þjóðarbúsins sé ekki síst því að kenna að virkjanaframkvæmdir hafi verið helst til miklar og er afar upplýsandi að það skuli koma fram og ekki seinna vænna, þar sem flestir hafa haldið til þessa að um hafi verið að kenna óráðsíu af hálfu fjármálastofnana og aðgæsluleysi yfirvalda hvað eftirlit með þeim varðaði.

  Í lok greinar sinnar lofa þeir síðan því að hætta ekki að berjast fyrir varðveislu „landbúnaðarhéraðsins Suðurlands” og er gott til þess að vita að til skuli vera þeir sem af fúsum og frjálsum vilja eiga sér þá hugsjón, en ekki er gott að sjá á hvern hátt það kemur þessu máli við, þar sem virkjanir í neðri hluta Þjórsár munu ekki hafa nema sáralítil áhrif á þessa þætti.

  Hugrenningar þeirra í lok greinarinnar um að ekki skuli neitt það gert sem stuðli að „sundrungu og andstöðu” hitta þá sjálfa fyrir á vægast sagt pínlegan hátt, því þetta segja þeir sem einna harðast hafa gengið fram í að stuðla að sundrungu á því svæði sem til umfjöllunar er.

  Vitanlega er það svo að flestum er ljóst að ef virkja á vatnsföll á Íslandi, þá koma sterkast til greina þau svæði í neðri hluta Þjórsár sem í dag eru ónýtt. Þannig er að þegar er búið að byggja upp miðlunarmannvirki þau sem til þarf og því er augljóst að hagkvæmt er að nýta þau með virkjunum í neðri hluta árinnar.

  Þúfnapólitík Vinstri grænna á ekkert erindi inní þessa umræðu, því hér er um raunverulegt hagsmunamál þjóðarinnar að ræða en ekki útópíska draumsýn.

 

Þessi grein birtist í Morgunblaðinu í dag (10.09.2009).

 

Athugasemdir

[Jón Ólafur Vilhjálmsson, 10.9.2009 kl. 21:01]

Auðvita á að virkja þarna  anað er sóun á v erðmætum, en það er nokkuð sem við höfum ekkert efni á.

Allt klárt miðlun á vatni þekking og kaupandi er trúlega til en ég hefði helst vilja að við myndum nota aflið frá þeim á suðurlandi svo sem í Þorlákshöfn.

[Ingimundur Bergmann, 10.9.2009 kl. 22:39]

Sæll Jón, víst væri það ljúft, en Þorlákshöfn er bara ekki hafskipahöfn, því miður. Hefur ekki verið í umræðunni að nota orkuna til að knýja netþjónabú eða eitthvað ámóta. Bestu kv.

[Guðmundur Guðmundsson, 12.9.2009 kl. 08:04]

Já, svo er nú það með VG, komnir í lykilstöðu, og nú er allt í kaldakoli, atvinnuleysi fyrirsjáanlegt, mörg heimili á leiðinni á hausinn, bankarnir ónýtir osfrv.  Ég er ekki að kenna VG um það en á þessum tímum þar sem framkvæmda er þörf, nánast hvaða framkvæmda sem er, gengur formaður VG fremstur í flokki og lýsir því yfir hvað eftir annað að hann og (væntanlega) hinir í VG vilji ekki stóriðjuframkvæmdir.  Og hvaða afleiðingar hefur það?, jú engin stóriðja, engar virkjanir, engar virkilega mannfrekar framkvæmdir.  Þetta hlýtur að vera besta stefna sem til er á þessum tímum.

[Ingimundur Bergmann, 12.9.2009 kl. 09:43]

Sæll Gummi og takk fyrir síðast. Já, við eigum víst öll að leggjast í fjallagrasatínslu, njólaræktun, hundasúruát og þá verður allt gott, skv. reglunni ,,það er vont en það venst"; en annars bestu kv. frá okkur til ykkar í austrinu