Staðan er tæp, en vonin er eftir

Á CNN.COM sjáum við að það er gott að eiga góða að, þegar á þarf að halda.

Skjámynd 2024-02-03 080707Fjarlægar stjörnuþokur heilla og þegar rætt er um heimsmálin þessa dagana, getur komið upp sú hugdetta, hvort ekki væri betra að sumir leikaranna á stjórnmálasviði heimsbyggðarinnar eins og við þekkjum hana, væru staddir á annarri vetrarbraut!

Slagurinn um forsetaembættið er hafinn í Bandaríkjunum og eins og flestir munu vita, eru það tveir karlar sem berjast um embættið, en báðir eru búnir að máta sig talsvert áður við stólinn sem barist er um.

Báðir eiga þeir sér sögu sem oft hefur verið rakin og það væri einungis til að æra óstöðugan, að draga hana upp einu sinni enn.

Það kostar sitt að berjast til embættis vestur þar og það eru fáir klárar svo illa tamdir að ekki sé hægt að notast við þá í baráttunni um peninga til að fjármagna slaginn.

_ _ _

Ritari fór á óborganlega leiksýningu síðastliðinn laugardag í Borgarleikhúsinu og sá Deleríum Búbonis eftir þá bræður Jón Múla og Jónas Árnasyni sem voru meistarar á sínu sviði.

Undir galsanum og gríninu leynist alvarlegur tónn, þar sem komið er inn á pólitíska spillingu, atkvæðakaup og sitthvað fleira í íslensku samfélagi og það merkilega er, að verkið hefur elst vel og á ekki síður við í dag en það gerði þegar það var samið.

Sumt breytist ekki svo neinu nemi og það gildir um spillinguna.

Hún lifir sínu lífi, ýmist á yfirborðinu og ef hún þrífst ekki þar, þá er hún undir því og ef til vill, er hún svo allt um kring þegar betur er að gáð!

Þannig er það, að spillingin finnur sér leiðir, nærist og blómstrar, hvort sem þjóðfélögin eru lítil eða stór.

Karlarnir tveir sem berjast um völdin í USA eru engir englar og eiga sér fortíð.

Báðir eru búnir að vera forsetar í þessu mikla ríki, þannig að þeir vita hvað það er, að fara fyrir því og hvað undir yfirborðinu leynist.

Annar ,,tamdi" Putin og Kim eða öfugt og hinn glímir við að temja hundinn sinn og gengur það svo illa að hann, þ.e.a.s. hundurinn, var komin í einhverskonar ,,fjarvist" þegar síðast fréttist.

Báðir vilja temja heiminn, en hvorugur vill temja sjálfan sig og það eru þessir kostir sem bandarískir kjósendur koma til með að standa frammi fyrir.

Verði þeim að góðu, allra hluta vegna og vonandi ber heimsbyggðin ekki skaða af, hvor sem fyrir valinu verður.

Staðan er tæp, en vonin er eftir.


Hagfræðimessan

Hagfræði er ein þeirra fræðigreina sem við teljum okkur mörg skilja og kunna, en þó einkum þegar okkur hentar! Í gær (þann 6/3/2024) var rætt við Stiglitz sem við könnumst við af nafninu og úr fréttum, en hann hefur hlotið Nóbelsverðlaun fyrir framlag sitt til hagfræðinnar.

Skjámynd 2024-03-07 065051Við sem erum svo heppnir að eiga konur, þekkjum hagfræði hinnar hagsýnu húsmóður og vitum að sú hagfræði bregst seint!

Sjálfsagt eru þó undantekningar á þeirri reglu sem fleirum, en við veltum okkur ekki upp úr því og hugum að því sem verðlaunahafinn hefur til málanna að leggja og það er sannarlega áhugavert.

Í ljós kemur nefnilega, að seðlabankastjórar almennt, hafa veðjað á rangan hest og fá falleinkunn í fræðum sínum.

Þeir hafa víst nokkuð margir farið þá leið að hækka svokallaða stýrivexti í þeim yfirlýsta tilgangi að kveða niður verðbólgudrauginn, með því að stinga á þensluna sem við, sem ekkert kunnum í fræðunum, köllum framtakssemi og dugnað eða eitthvað þaðan af verra.

Joseph Stiglitz segir þessa framtakssemi seðlabankastjóra virka sem olíu á eld og fór þá sem okkur hina kunnáttulausu grunaði, að draugar verða ekki kveðnir niður með því að blása þá út.

,,Stiglitz er heimsþekktur hagfræðingur og var meðal annars yfirhagfræðingur Alþjóðabankans og var efnahagsráðgjafi í ríkisstjórn Bill Clinton, fyrrum forseta Bandaríkjanna", segir orðrétt í frásögn Rúvsins og að þessu tiltöldu ásamt Nóbelnum, þá vega orðin þungt.

Stiglitz er jákvæður á hagkerfi heimsins og telur að þau muni jafna sig á öllu og öllu og þar á meðal á innrásinni í Úkraínu og eftir að Rúvarar hafa fært talið að ,,þeirri verðbólgu" sem þá myndaðist, kveður Stiglitz upp úr með, að allt muni þetta nú jafna sig fljótlega.

Fljótlega er eitt af þessum teygjanlegu hugtökum og það jafnvel í hagfræðinni líka, svo við lifum í voninni, en horfum með furðu til hins vinstrigræna seðlabankamusteris sem íslenska þjóðin hefur komið sér upp í höfuðborginni.

Þar virðist stefnan vera að drepa allt framtak í dróma og koma sem flestum rekstri í hendur opinberra aðila, ef ekki á hausinn; vextir sleikja 10 prósentin og ljóst má vera, að það er sjaldgæfur atvinnurekstur sem stendur undir slíku okri.

Messan var flutt, en að á hana hafi verið eða verði hlustað er ólíklegt.

Uppröðun myndarinnar er í stíl við skilning ritara á fræðigreininni.


Fésbókin sem hvarf, ásamt símagreiðslukerfinu!

Myndin af branduglunni og textinn eru að þessu sinni fengin úr Morgunblaðinu...

Skjámynd 2024-03-07 095906... það sama má segja um teikninguna sem er til hægri og eflaust finnst mörgum það vera rétt uppröðun.

Sú til vinstri er eftir Halldór en hin eftir Ívar og líklega passar að hafa röðunina eins og hún er!

Þau undur og stórmerki gerðust um daginn, að einn af föstu punktunum í tilveru nútímamannsins Fésbókin, hvarf eins og slökkt væri á ljósi og fleira fylgdi með, því a.m.k. undirritaður gat ekki greitt reikninga með síma sínum seinni part dagsins.

Fyrst í stað var hægt að bjarga því með greiðslukorti, en svo virkaði það ekki heldur og eins og svo oft, var það kona sem kom til bjargar og reikninginn reyndist hægt að greiða með gamaldags millifærslu og þar með komst ritari upp í nýviðgerða og þvegna rennireið sína og gat lagt af stað heim á leið, eftir daglanga veru í Reykjavík.

Sannaðist þar að gott er, fyrir gamla karla að eiga góða að þegar á þarf að halda og nær örugglega var það furðusvipur sem kom á karlahópinn sem fylgdist með greiðsluaðferðinni!

Seðlar eru úr sögunni, enda getur enginn rogast með það magn íslenskra peninga í vösum sínum, sem nota þarf núorðið í viðskiptum og augljóst er, að styttast fer í að taka þurfi nokkur núll aftan af krónutetrinu.

Heim á leið var farið og með hálfum huga og stöðvað við bensíndælu á Selfossi til að taka olíu og þar virkaði allt, enda notað sérhannað kort frá söluaðila og stofnað til skuldar!

Allt er gott sem endar vel og hafi Bílabúð og bílaþjónusta Benna þökk fyrir verkið, sem eflaust var vel unnið sé tekið mið af fyrri reynslu.

Í dag verður farið á Selfoss og látið reyna á, hvort tilveran sé svört eða björt hvað fyrrnefnd tæknimál varðar og ef ekki, þá verður bara að hafa það!


Veðjað á rangan hest?

Það sem Putin og ríkisstjórn Rússlands lagði fram, sýnir að Úkraínu stóð til boða að vera hlutlaust ríki

Skjámynd 2024-03-04 064531The Wall Street Journal rifjar upp tillögur Rússa að friði í Úkraínu sem lagðar voru fram af hálfu ríkisstjórnar Rússlands árið 2022.

Tillögunum var hafnað og kosið að fara þess í stað í stríð, sem enn stendur eins og flestum er kunnugt.

Í tillögunum – sem aldrei voru ræddar – kom ýmislegt áhugavert fram fram, sem vert er að kynna sér.

Grein WSJ er nokkuð löng og verður ekki birt í heild sinni hér, en hana má nálgast á tenglinum hér að ofan.

Eftir stendur spurningin um, hvers vegna friðartillögurnar voru ekki ræddar og látið á það reyna hvort hugur fylgdi máli.

Auk þess má líka leiða hugann að því, hvort ekki hefur vantað eitthvað upp á friðarvilja vestan megin frá.

WSJ bendir á í upphafi greinar sinnar, í lauslegri þýðingu, að stríðið sé búið að standa í tvö ár og segir síðan:

,,Afstaða úkraínskra stjórnvalda og vestrænna bandamanna þeirra hefur verið, að engar friðarviðræður komi til greina á meðan rússneskir hermenn eru í Úkraínu. Myndin sem oftast er dregin upp er, að markmið Rússa sé að taka yfir Úkraínu og ráðast síðan á önnur lönd í Evrópu. The Wall Street Journal hefur birt friðartillögurnar sem Vladimir Pútín Rússlandsforseti setti fram árið 2022.“

Miðillinn virðist hafa tillögurnar undir höndum og geta vitnað í þær og gefur kost á að menn geti kynnt sér þær.

Myndir af hörmungunum sem gengið hafa yfir Úkraínu í kjölfar þess að upp úr sauð og að Rússar sáu sér ekki annan kost vænni, en að ráðast inn í landið, fylgja með í greininni en þær verða ekki birtar hér.

Við vitum að sannleikurinn er valkvæður þegar milliríkjadeilur eru annarsvegar og þær þarf svo sem ekki til, en ljóst má vera, að sú mynd sem dregin hefur verið upp, er ekki raunsönn, skýr, né heiðarlega sett fram.

Líkt og svo oft, eru a.m.k. tvær hliðar á málum þegar deilt er og það er alls ekki víst að sú hlið sem okkur er sýnd sé rétt.

Að því gefnu að WSJ fari rétt með, þá hafa leiðtogar vesturlanda með Bandaríkin fremst í flokki, tekið þann kost að snúa röngunni út og veðja síðan á rangan hest, ef svo má segja.

Fyrir þetta líður heimsbyggðin í dag og við bætist ófriðurinn og hörmungarnar í Miðausturlöndum, sem engan endi virðist hægt að sjá á.

Þeir sem vilja kafa dýpra geta einnig kynnt sér þetta sem er frá sama miðli:

Missti Úkraína af möguleika sem var til að gera samninga við Rússa?


Hnípin þjóð í vanda

Það er hluti af mannlífinu að huga að leiðum til að komast um. Það er ekkert nýtt að svo sé gert en það sem er nýtt í þessu, er að komnar eru fram hugmyndir um að breyta lélegum malarslóða í almennilegan þjóðveg.

Skjámynd 2024-02-27 071842Verði það úr munu samgöngur milli norður- og suðurhluta landsins gerbreytast til batnaðar, auk þess sem álagi mun létta á því vegakerfi sem nú er notast við til að komast landleiðina milli þessara landshluta.

Í framtíðinni má sjá fyrir sér, að vegir verði líka lagðir eftir hálendinu milli austur og vesturlands sem myndi létta verulega á hringveginum.

Eins og flestir vita er mikið álag á honum, allt frá Reykjavík og austur og norður um, svo það gæti orðið mikil samgöngubót að fá góða hálendisvegi milli landshlutanna og ætti þess vegna að skoða þessa möguleika með jákvæðu hugarfari.

Skjámynd 2024-03-01 040332Evrópskir bændur búa við mikið skrifræði, sem varla telst til tíðinda.

Skrifræði hefur almennt aukist mikið og svo er komið, að blekpésar stjórna nánast öllu í samfélögunum á bakvið tjöldin. Því miður er það ekki svo að pésar þessir séu almennt vitrari en gengur og gerist og sumum finnst jafnvel að það sé síður en svo.

Víst er, að oft skortir þekkingu og yfirsýn hjá þessum ágætu pésum, sem lært hafa á náttúruna, að mestu við skólaborð.

Því er það svo, að það skerst stundum í odda á milli fólksins sem er úti á örkinni og er að vinna hin raunverulegu störf og pésanna fyrrnefndu.

Við höfum séð nokkur dæmi um þetta í samfélaginu okkar, t.d. varðandi virkjanaáform, sem flest stranda og jafnvel verða að engu vegna afstöðu blekpésa sem vissulega telja sig ,,græna“ og reynast vera það þegar upp er staðið, en í öðrum skilningi þess orðs.

Samkvæmt skoðanakönnun er flokkurinn sem telur sig vera til vinstri og jafnframt grænan á leið út af sviðinu. Málin gætu því staðið til bóta, en hafa verður í huga í því sambandi, að smitið hefur stungið sér niður víðar!

Skjámynd 2024-03-01 043200Hér er ágætt dæmi um hvað við er að eiga. Menn á Vestfjörðum hafa hug á að virkja lítil vatnsföll með rennslisvirkjun, til að treysta orkuinnviði.

Sé farið yfir textann, sést að umhverfisfræðingar hafa komist að því, að virkjunin sé háð umhverfismati því áhrifin á umhverfið séu umtalsverð o.s.frv.

Nánast allt, sem hægt er að láta sér detta í hug að gæti gerst vegna virkjunarinnar er síðan tínt til í þeim tilgangi greinilega, að sýna fram á, að sem flest sé neikvætt við fyrirhugaða virkjun.

Líklegast er að framkvæmdin verði ekki að veruleika, því þess er vandlega gætt, að geta þess í engu, að stundum þurfi að fórna minni hagsmunum fyrir meiri. Helst gæti manni dottið í hug, að best sé fyrir Vestfirðinga og náttúrulega alla aðra, að framleiða orkuna sem mest með olíuknúnum rafstöðvum, því þá verði áhrifin á náttúruna sem minnst eða jafnvel engin.

Nema náttúrulega erlenda náttúru, en frekar auðveldlega má loka augunum fyrir því.

það er svo langt í burtu að við sjáum það ekki, heyrum það ekki og finnum það ekki!

Til að knýja slíkar rafstöðvar þarf olíu, en það er vafalaust líka hægt að loka augunum fyrir því á þeim forsendum, að hana þurfi hvort sem er að flytja inn vegna ýmislegs annars!

Eftir situr hnípin þjóð í vanda, sem veit ekki hvernig hún á að kenna vitringunum sínum, hvernig greina skuli kjarnann frá hisminu, að fórna minni hagsmunum fyrir meiri og almennt, að horfa fram á veginn í stað hins gagnstæða.

Vatnið rennur, hvort sem það fer í gegnum hverfla eða ekki og sama má segja um vindinn, hann blæs hvað sem við segjum eða gerum og þannig mætti áfram telja.


Endurvinnsla og hagsmunir

Það eru margir að vinna góð verk, sem eru hagkvæm, bæði fyrir land og þjóð og í Hveragerði er, svo dæmi sé tekið, fyrirtæki sem hefur unnið að því að þróa aðferðir til að geta endurunnið plast sem notað er m.a. til að pakka inn heyi og gera það nothæft að nýju.

Rúlluplast er flutt inn í stórum stíl, enda frábært efni t.d. til að nota utan um hey til að verja það fyrir skemmdum og vernda í því ferskleikann.

Þeir sem eru að vinna að endurvinnslu þess, stuðla að því að koma í veg fyrir sóun á verðmætu hráefni og minnka mengun svo um munar.

Skjámynd 2024-02-25 082840Alifuglabændur komu saman á dögunum til að ræða sín mál og eins og kemur fram í fréttinni, að standa í ístaðinu varðandi óraunhæfar kröfur sem koma að mestu frá Evrópu.

Kröfur sem ætlast er til að evrópskir bændur, en þó ekki allir, uppfylli hvað sem það kostar og algjörlega burtséð frá því, hvort það er nokkrum til gagns, nema þá ef vera kynni þeim sem lána fé til uppbyggingar og framkvæmda.

Kröfurnar eru meiri til íslenskra bænda t.d. hvað varðar þéttleika í húsum, en þeirra erlendu og eins og allir vita sem byggt hafa, hvort sem það er yfir sig eða eitthvað annað, þá kosta byggingar peninga.

Framhjá slíku horfa einkavinir alls sem heita hefur, gera aðeins kröfurnar og þá algjörlega án þess að tillit sé tekið til þess, hvort þær séu einhverjum til gagns, hvort heldur sem um er að ræða fólk eða fénað, náttúru eða tilveru yfirleitt.

Eitt af frægustu dæmum af flumbrugangi blýantsnagara er þegar Mette nokkur í Danmörku, rauk til - eflaust að ráðum valinkunnra sérfræðinga - og náði því fram að minkastofninn í því ágæta landi var drepinn og grafinn, án þess að nokkur rök væru fyrir því færð fram sem mark var á takandi.

Flumbrugangurinn var slíkur, að minkar þessir gengu síðan aftur, með frekar sérstökum og ógeðfelldum hætti, því þeir risu upp úr gröfum sínum, öllum sem vitni urðu að, til hrellingar og hremmingar, því lyktin af hinum niðurgröfnu dýrum var ekki sérlega góð, eftir þetta sérkennilega framtak hinnar dragtklæddu konu og félaga hennar.

Við skulum vona, að ekki verði gengið jafn langt í brjálæði líku þessu hér hjá okkur á Íslandi en sérkennilegt er, að verið sé, að gera ítarlegar og stundum vanhugsaðar kröfur til fólksins sem er út á örkinni.

Kröfur sem síðan kemur í ljós, að ekki eru gerðar, þegar spámennirnir á Alþingi snúa sér að því, að grafa undan innlendri framleiðslu með innflutningi frá löndum, þar sem litlar sem engar reglur gilda hvort heldur er til mannlífs eða húsdýralífs.

Þá gildir það eitt sem orðað hefur verið sem svo: Bara þegar það hentar mér!

Evrópskir bændur hafa risið upp í hverju landinu af öðru til varnar gegn rugli jakkafataklæddra möppudýra, sem allt telja sig vita, en reynast síðan fátt vita, um þau mál sem þau eru að fara með.

Hvernig þau mál fara er ekki útséð með, en fróðlegt verður að fylgjast með framhaldinu.


Macron fékk málæði

Það hefur verið í fréttum, að forseti Frakklands útilokaði ekki að senda 2024-02-28 (17)franska hermenn til Úkraínu.

Umfjöllun um málið finnst á ýmsum miðlum svo sem The Guardian, Russya today og Morgunblaðinu.

Sjálfsagt mun umfjöllun finnast víðar og fram kemur að ,,sjálfboðaliðar" af ýmsu þjóðerni eru þegar til staðar í Úkraínu.

Sé það rétt eftir haft, að forseti Frakklands hafi haft orð á því að senda franska hermenn á ófriðarsvæðið, þá eru það nokkuð mikil tíðindi og aðgerð sem gæti haft alvarlegar afleiðingar.

Frakkar hafa um aldir látið sig dreyma um, að leggja Rússland undir sig, ýmist í heild sinni, en líka að hluta og sjálfsagt er það glámskyggni að reikna með, að þeir draumar séu úr sögunni.

Flestir munu kannast við innrás Napóleons inn í Rússland, sem endaði þannig að herjum hans tókst að komast til Moskvu og brenna hana nánast til grunna, en fundu þar lítið af fólki.

Að því loknu hundskuðust hann og liðsaflinn, heim á leið og komust til síns heima, það er að segja sumir, og óhætt er að segja að það voru ekki nema leifar af her sem komst að lokum til heim til sín.

Þannig hefur þetta gengið, að reynt hefur verið en ekki tekist, að sigrast á víðáttunni austur þar, af alls konar lýð og skemmst er að minnast innrásar Hitlershersins á síðustu öld.

Í þeim her var alls kyns mannskapur, frá ýmsum evrópskum löndum og þar á meðal Úkraínu.

Nú langar hinn makalausa Macron til að feta í fótspor forveranna, en hætt er við að endirinn yrði líkur fyrri slíkum leiðöngrum.

Rússland er eitt af kjarnorkuveldunum og gera má ráð fyrir að það myndi svara fyrir sig með hverju sem þyrfti, ef að því yrði sótt, af Atlantshafsbandalaginu (NATO) og að heimsbyggðin gæti orðið lengi að ná sér eftir hildarleik af því tagi.

Við skulum því vona að Macron og aðrir vestrænir leiðtogar nái áttum áður en þeir steypa tortímingarstyrjöld yfir heimsbyggðina.

Það er alls ekki víst að þeir sem hæst gaspra nú um stundir og hyggja á mikil stórræði, ríði feitasta hestinum heim frá slíkri viðureign.

Það er að segja, ef það þá fyndist handa þeim hross til að níðast á.


Í mörg horn að líta

Zelensky ,,vinur" okkar Íslendinga segir eitt og annað í viðtali við CNN.COM.

Skjámynd 2024-02-27 063800Það fyrsta er, að hann segir Trump ekki skilja Putin, vegna þess að hann hafi aldrei tekist á við hann.

Þarna skýst glöggum, því það er einmitt það sem Trump gerði á sínum tíma og báðir komu sælir og glaðir af þeim fundi!

Þá heldur hann því fram að Trump sé á móti Bandaríkjamönnum ef hann styðji ekki Úkraínu, sem eins og flestir munu vita, er kunnugleg Skjámynd 2024-02-27 063715og barnaleg einföldun sem stundum er sett fram í deilum milli t.d. barna: Ef þú ert ekki með mér, ertu á móti mér!

Trump hefur víst ekki viljað gefa það upp hvort hann vilji að Rússar eða Úkraínar vinni stríðið, sem gæti einfaldlega stafað af því að ólíklegt er, að Rússar tapi stríðinu.

Nema þá á þann hátt, að allir tapa í stríði og til þess hefðu menn átt að hugsa áður en Skjámynd 2024-02-27 063745efnt var til þess.

Gildir það ekki síst um Úkraína sem ekki gátu eða vildu, haft stjórn á því liði sem herjaði á Donbas frá Úkraínu.

Svo er að skilja á Zelensky, að til að kynnast mönnum, þurfi að takast á við þá.

Vel getur eitthvað verið til í því, en þó segir það ekki alla söguna, a.m.k. telur sá sem þetta ritar sig þekkja nokkuð marga án þess að hafa tekið við þá glímu af nokkru tagi!

Fram kemur að Zelensky heldur því fram að mannfall Úkraínu sé meira en helmingi minna en það sem Bandarísk yfirvöld telja það vera.

Engin leið er að sannreyna þessar fullyrðingar Zelenskys frekar en svo margar sem hann hefur sett fram en hitt er vist:

Að mannfallið og eyðileggingarnar eru hörmulegar og hefðu aldrei þurft að verða ef menn hefðu rætt sig til niðurstöðu um deilur sínar eins og menn.

Til þess að það hefði getað orðið, hefði þurft að horfast í augu við fyrirliggjandi staðreyndir og síðan, að vinna að lausnum út frá því sem þar kæmi fram.

Það var því miður ekki gert, skaðinn er því orðinn og þá verða menn að horfast í augu við það eins og það er og vinna út frá því. Nema að ætlunin sé að hjakka í stríðsfarinu út í það óendanlega, sem varla er hægt að ætla nokkrum manni að vilja.

Sagan sýnir að það er auðveldara að hefja styrjaldir en að ljúka þeim og því er best að reyna allar aðrar leiðir áður en farið er út í styrjaldarrekstur, en sagan sýnir líka, að þeir eru til sem vilja sífellt vera að stríða og þarf ekki að fara langt til að finna dæmi um það og undirritaður treystir sér ekki til að telja upp með neinni vissu hve oft og víða vinir vorir og verndarar hafa herjað á lönd og þjóðir.

Og eitt sinn vorum við í hópi hinna viljugu!

Sé það ætlunin að herja þar til yfir lýkur, þá er fokið í flest skjól fyrir alla sem vilja að ófriðnum ljúki.

Það er dapurleg framtíðarsýn, en viðtalið við Zelensky er hægt að lesa, hafi menn áhuga á, með því nota sér tengilinn sem er hér í byrjun textans.

(Myndirnar af körlunum þremur eru fengnar af vef CNN)


Lifað í fortíð?

Hjá Bændasamtökunum er ýmislegt að gerast eins og svo oft áður og félagar í samtökunum þurfa að kjósa sér formann.

Skjámynd 2024-02-24 082238Sitjandi formaður gefur kost á sér til endurkjörs, hefur verið farsæll í starfi og hefur ná að sameina samtök bænda.

Bændur í landinu eru alla vega, þeir fást við margvíslegan búskap, en það er kjötframleiðslan sem tekur mest pláss í umræðunni og um hana er þarft að ræða.

Kjötframleiðslugreinarnar eru nokkrar: S.s. alifuglarækt - til framleiðslu á kjöti og Skjámynd 2024-02-24 082210eggjum -, svínarækt, nautgriparækt - til mjólkur og kjötframleiðslu, þá má nefna geitfjárrækt og sauðfjár, auk þess sem talsvert fellur til af hrossakjöti, þó þau séu nú orðið ekki beinlínis ræktuð í þeim tilgangi svo teljandi sé.

Bændasamtökin hafa breyst og ætli ekki megi segja að svo sé nú komið, að  flestir bændur finni sig í samtökunum, hvaða búgrein sem þeir annars stunda.

Við erum enn nokkur á fótum, sem munum hvernig samtökin voru, þ.e. þegar þau voru bundin við hefðina sem var, þegar landbúnaðurinn var sauðkindur, kýr og hestar og þá í þeirri röð.

Undirritaður tók, svo dæmi sé tekið, þátt í því að sigla með heilu skipsfarmana af nýslátruðu lambakjöti í heilum skrokkum, til útlanda í sláturtíðinni.

Kjöt sem selt var þangað svo nýslátrað og ferskt, að það var ekki einu sinni komið almennilegt frost í það!

Frystikerfi skipsins þurfti að keyra á fullum afköstum allan lestunartímann og á siglingunni yfir hafið, til að ná upp frosti í vörunni, til að við henni yrði tekið í erlendri höfn.

Allt er þetta liðin tíð sem betur fer, þó finna megi sögur af frystigámum með lambakjöri, sem flækst hafa landa á milli, þar til þeir döguðu að lokum uppi, t.d. í Færeyjum; voru þá búnir að flækjast allt til sólarlanda og enginn vissi til hvers!

Það voru stigin gæfuskref þegar Bændasamtökin breyttust í nútímahorf; breyttust frá því að vera fyrst og fremst samtök sauðfjárbænda og yfir í það að vera samtök allra bænda.

Vissulega var fyrirferð sauðfjárræktarinnar mikil á fyrri tímum þegar kindakjöt var KJÖTIРog kom þar á móti fiskinum sem var ÝSAN, hin eina og sanna.

En nú eru breyttir tímar og við lifum í nútíðinni.

Meira er nú neytt í landinu af kjúklingakjöti en kindakjöti og það svo miklu munar, ef hlutfallið bein á móti kjöti, væri tekið með og því er það, að samkvæmt hinu forna viðmiði, ætti formaður Bændasamtakanna að koma úr röðum kjúklingabænda!

Svo er ekki og það er ágætt, hefur gefist vel og núverandi formaður hefur haft gott vald á hlutverki sínu.

Þó er komið á móti honum framboð!

Sauðfjárbændur harma sinn hlut og sakna fyrri tíðar sem rekja þarf nokkur ár aftur, eða aftur til þess sem var, áður en núverandi formaður kom til sögunnar, en hann hefur leitast við að gera öllum búgreinum jafnt undir höfði, ef svo má segja.

En af hverju harma sauðfjárbændur sinn hlut?

Er það vegna þess að ekki hafi verið haldið vel á því sem að þeim snýr?

Svarið er nei.

Núverandi formaður kemur úr röðum garðyrkjubænda og það hefur gefist vel og ekki annað að sjá en hann hugi að hag bændastéttarinnar sem heildar, og hvers vegna ætli það sé?

Algengasta meðlæti sem notað er með kjöti, er einhver afurð garðyrkjunnar.

Það eru afurðir garðyrkjunnar sem sameina okkur í kjötátinu!

Það skyldi nú ekki vera að þar sé fundin ástæðan fyrir því að núverandi formaður sameinar en sundrar ekki, að hann sjái vítt yfir og vilji hag allra jafnt? Hugsi ekki um sérhagsmuni, heldur heildarhagsmuni.

Geti menn ekki fundið sér farveg og verið sáttir við sinn hlut undir slíkum kringumstæðum, ættu þeir að kanna hvort ekki sé rétt að stofna sérstök samtök um að koma sínum málum á framfæri.

Þess þarf reyndar ekki, þegar betur er að gáð, því slík samtök sauðfjárbænda eru þegar til staðar og eru innan heildarsamtaka bænda!

Gallinn er bara sá, að hér hefur verið dottið niður í gamalt uppþornað hjólfar, eftir þau sem ekki töldu menn og konur til bændastéttarinnar, nema þeir byggju með sauðkindur.

Við getum horft til fortíðarinnar og lært af henni, en ekki lifað í henni!


Hundahald í Hvíta húsinu

Fjallað er um bitvarg sem hafður var og er(?) í Hvíta húsinu í Washingthon. í Morgunblaði dagsins.

Málið hefur verið í fréttum áður og snýst um hundahald Biden forseta, en þótt maður hafi gengið undir manns hönd til að koma vitinu fyrir hinn bitglaða hund, hefur það ekki tekist.

Skjámynd 2024-02-22 055024Svo er að skilja sem skepnan hafi frekar litla lyst á húsbónda sínum og bíti því frekar saklausa starfsmenn sem á vegi hans verða.

Biden var sem sagt, ekki bitinn af vini sínum, samkvæmt því sem fram kemur í fréttinni, en margt er það annað sem plagar á því heimili.

Kosningar eru framundan í Bandaríkjunum og Biden hefur bitið það í sig, að hann sé ómissandi en það eru ekki allir sammála um að svo sé og sem eðlilegt er, þá telja andstæðingar hans í pólitíkinni þar vestra, að annar kostur sé betri.

Það er vart hægt að segja það og enn síður prenta, að sá sem keppi við forsetann núverandi, sé góður kostur fyrir Bandaríkin, eða heimsbyggðina og hvers vegna skyldi það nú vera?

Sá skrautlegi gaur, sem bíður sig fram fyrir Republikana stendur nokkuð vandræðalítið í lappirnar og man sumt af því sem hann hefur sagt, þó margt sé og sumt af því æði skrautlegt.

Er að vísu enginn sérstök siðferðisfyrirmynd, en líklega vegna þess hve hann er skrautlegur, kjaftfor og uppátektasamur, virkar hann sem ferskur andi  (Púki?)inn í uppákomurnar og uppslættina sem einkenna slaginn um það hver skuli verða forseti þar vestra næstu fjögur árin.

Við bíðum og sjáum til hvernig fer, varðandi val Bandaríkjamanna á leiðtoga fyrir þjóðir sínar.

Fátt bendir til að annað verði í boði þar vestra en karlarnir tveir sem hér hafa verið nefndir, annar með ,,hundshaus" og hinn með raunverulegan hund til að leita ráða hjá í raunum lífsins og embættisins.

Við bíðum spennt eftir framhaldi málsins!

Myndin er fengin úr frétt Morgunblaðsins.

 


mbl.is Vandamálið umfangsmeira en áður var talið
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband