Fuglar og menn

Tveir fuglar stinga saman nefjum og velta fyrir sér tilverunni. Mannlífið er þeim talsvert hugleikið og þeir sjá margskonar samsvörun milli manna og dýra.

Heyrðu félagi, hefurðu fylgst með Morgunblaðinu frá því fyrir og eftir kosningarnar?

Nei, kannski ekki nógu vel til þess að ég geti haft eitthvað sem máli skiptir eftir, en þú?

Jú, jú, blessaður vertu, nú eru þeir orðnir svo róttækir að gamli Þjóðviljinn sem var, er sem hreinn hégómi í þeim samanburði.

Rétt hjá þér og vilja allt bæta, betra og laga, er það ekki?

Jú, nú má t.d. ekki taka við peningum úr ríkissjóði nema vera til þess sérstaklega skráður, veginn og réttmætur metinn.

Rétt er það og batnandi mönnum er best að lifa er það ekki?

Jú, jú og nú skal allt vera rétt gert, en ég hef áhyggjur af einu.

Hvað er það gamli, góði vinur? Þú ert ekki vanur að láta áhyggjurnar þjaka þig, hvað er að?

Það er þetta með vináttuna sem ég er að hugsa um þ.e.a.s. af hverju eru bestu vinir allt í einu orðnir verstu vinir og öfugt?

Hvað áttu við með því?

Nú eru Bandaríkjamenn ekki lengur vinir okkar og það þykir mér dálítið leitt.

Blessaður vertu ekki að láta það þjaka þig og þyngja hugann, Úkraínar eru komnir í staðinn og þeir eru miklu betri!

Er það af því að þeir eru í stríði við Rússa?

Já, þannig er það nú, að maður skiptir um föt þegar hentar.

En vinir eru ekki föt!

Rétt hjá þér, þeir eru ekki föt en sé maður sjálfstæðis, þá skiptir maður um vini til að vera ferskur.

Er það eins með hina flokkana?

Já, já, þú sérð t.d. Samfylkinguna, hún er núna komin í lið með Úkraínum og nýnasistunum þar og kann sér ekki læti og það svo, að gamli utanríkisráðherrann er sem hreinræktaður kommi í þeim samanburði.

Satt segirðu, hún er skrýtin tík þessi pólitík!

Samskipti þjóða og manna

Rússar hafa farið fram á að opnað verði að nýju fyrir beint flug milli Rússlands og Bandaríkjanna.

Frá þessu er sagt á vef CNN og svo virðist sem að óskin sé sett fram í beinu framhaldi af sneypuför Zelensky á fund með forseta Bandaríkjanna.

Hvort það er þannig verður ekki fullyrt af ritara en tímasetningin gæti bent til þess.

Flestum mun vera kunnugt hvernig þeim gekk að ræða málin á fundi sem fram fór fyrir stuttu, þar sem Trump skammaði Zelensky fyrir óraunsæi og heimtufrekju.

Sá veldur miklu sem upphafinu veldur, segir í íslensku máltæki en eins og kunnugt er þá er sannleikurinn afstæður og því er því hafnað af þeim sem styðja úkraínsk ,,stjórnvöld", að þau eigi nokkra sök á því hvernig komið er og því ástandi sem við fylgjumst með í fréttum.

Þó eru þeir til sem muna eftir viðvörunum Rússa sem birtust í formi vopnaskaks við ,,landamærin" milli ríkjanna og við munum líka að enginn friður ríkti í sjálfstjórnarhéruðunum eins og samið hafði verið um.

Það er í þessu eins og fleiru, að hver upphafinu veldur getur verið valkvætt og þar með líka í þessu tilfelli, hver ber ábyrgð á átökunum milli þjóðanna.

Við munum hollenska farþegaþotu sem skotin var niður af varnarliðum í Donbass fyrir herfileg mistök manna sem ekki kunnu með loftvarnarbúnað að fara.

Munum líka eftir fjöldagröfum sem árásarliðar frá Úkraínu höfðu grafið til að hylja óhæfuverk og líka óhugarlegar misþyrmingar á rússneskum hermönnum sem fengið höfðu það hlutverk að æða inn í Úkraínu í að því sem virðist hafa verið algjörlega vanhugsaður gjörningur.

Misþyrmingarnar enduðu með drápum en upptaka birtist á netmiðlum, þar sem fram kom hvernig staðið var að drápunum en eins og kunnugt er þá þykir það ekki boðlegt að myrða handtekna hermenn sem eru einungis að gera það sem þeim hefur verið skipað að gera.

Endalaust er hægt að þusa um þessa hluti en ef það reynist svo að forseta Bandaríkjanna takist að stöðva átökin, þá er það af hinu góða.

Þar er hins vegar við ramman reip að draga. því vilji er ekki fyrir að friður komist á og ófriðurinn er studdur dyggilega af stjórnvöldum í vestur- Evrópu og þar á meðal á Íslandi, þar sem ný ríkisstjórn eys af auknum krafti peningum úr ríkissjóði í stríðsrekstur Úkraína.

Ritari vonar að Trump nái því að trompa þetta lið og koma á friði, friði sem augljóslega verður ekki komið á með því að skaka kjarnorkuvopn framan í ,,andstæðinginn" sem eitt sinn þótti góður bandamaður þegar ,,vinirnir" vildu hreinsa upp auðlind hinnar litlu þjóðar norður í Atlantshafi.

Þá var gott að leita til Sovétríkjanna eftir stuðningi og viðskiptasamböndum og þeir sem fyrir því stóðu voru Sjálfstæðismenn!

Fundurinn og eftirköstin

Þeir komu saman til spjalls og ráðagerða í Washington, Trump og Zelensky og af því er orðinn mikill hvellur, sem er til umræðu í ýmsum miðlum og þ.á.m. á BBC, fyrir nú utan það, að íslenskir ráðherrar hafa séð ástæðu til að eyða íslenskum milljörðum í hergögn.

Umfjöllun BBC fylgir myndin hér að ofan og eins og sjá má eru karlarnir ekki alveg á eitt sáttir.

Trump segist ekki vilja stefna heimsfriðnum í hættu en Zelensky segir þjóð sína vera að berjast fyrir lífi sínu og sjálfstæði.

Gera má ráð fyrir að sannleikurinn liggi einhverstaðar þarna á milli og úr því þarf að vinna, til að úr verði friður, í stað þess að hætta á víðtækari átök.

Gera má ráð fyrir að innst inni sé vilji fyrir friði hjá hinum úkraínska forseta en við vitum það ekki með vissu, hann hefur ekki talað þannig og ekki er víst, að honum leyfist að tala þannig.

Forseti Úkraínu hefur sitt ,,bakland“ eins og það er kallað og í því baklandi eru ekki allir einlægir friðarsinnar og því verður forsetinn að haga orðum sínum í samræmi við þann veruleika.

Hvað sem segja má um skemmtikraftinn fyrrverandi, þá verður að viðurkenna að honum hefur gengið ágætlega að fá á sitt band fjöldann allan af vestrænum stjórnmálamönnum, álitsgjöfum og almenningi.

Við sjáum stundum fréttaflutning ýmislegt sem ekki stenst skoðun, fullyrðingar sem ekki standast o.s.frv. og flest er þetta sett fram á þann hátt, að Úkraína sé að berjast fyrir frelsi sínu en það er með frelsið eins og svo margt annað að það er teygjanlegt hugtak.

Samkvæmt því sem ritari veit best er verið að berjast um svæði sem kallað er Donbas og inniheldur Lughansk og Donesk.

Um það mun hafa verið samið árið 2014, að þessi svæði væru svokölluð ,,sjálfstjórnarsvæði“, sem ekki væru undir stjórn Úkraínu né Rússlands.

Það gekk misjafnlega eins og mörgum er kunnugt og ástæðan var ágengni úkraínskra manna inn á svæðið, manna sem frömdu þar ýmsa glæpi og jafnvel fjöldamorð sé tekið mið af því sem fundist hefur þar grafið í jörðu.

Maður nokkur sem ritari þekkir vel, hafði það eftir fyrrverandi tengdaföður sínum sem bjó austur þar, að hann vonaði það heitast að Rússar kláruðu dæmið fljótt og vel, þegar hann varð var við að þeir voru búnir að missa þolinmæðina og voru komnir inn á svæðið með her sinn.

Hvað sem þessu líður skulum við öll vona að friður komist á; Rússar eru búnir að setja fram sínar kröfur fyrir friði og þær eru einfaldlega að svæðið fái frið fyrir Úkraínum Því er spurt:

Hvers vegna er ekki hægt að ræða frið á þeim forsendum?

Upphaf enn meiri hörmunga?

BBC segir frá niðurstöðu rannsókna á upphafi þess sem við könnumst við sem stríð Ísraels á Gaza.

 

Ekki sá ritari að undirliggjandi ástæður þess mikla haturs sem ríkir milli Araba og Ísraels hefði verið skoðað í þessu samhengi en það má rekja langt aftur í sögulegu tilliti.

Ísrael var ,,vakið upp" eftir heimstyrjöldina síðari eftir að mönnum varð ljóst, hvað hafði gerst í Þýskalandi og víðar undir stjórn og með hernaði Nasista.

Heimsbyggðin var í losti eftir að dregið hafði verið fram í dagsljósið hvernig Þjóðverjar og dindilmenni þeirra höfðu hegðað sér á stríðstímanum.

Um þetta má fæðast eftir ýmsum leiðum og t.d. er bókin ,,Ég lifi" þar sem sögð er saga Martin Grey sem er ágæt heimild, þó hún sé ekki nema einn nagli ef svo má segja, í sögu sem aldrei má gleymast.

Það sem vakti athygli ritara þegar hann las sögu Martins og það sem kom honum einna mest á óvart, var hve illa hann bar úkraínskum handbendum Nasista söguna en þar fram kom, að þeir voru jafnvel enn verri en hinir þýsku nasistar sem yfir þá voru settir, t.d í fangabúðunum.

Stríðið milli Rússa og Úkraína að undanförnu hefur vakið ýmislegt upp og gera má ráð fyrir að Rússar muni söguna.

Rússar gleyma ekki því sem gerðist þegar Þjóðverjar og handbendi þeirra og þar á meðal voru Úkraínar réðust inn í Sovétríkin og vísa má til stríðsminjasafnsins í Pétursborg sem dæmi um hvernig sögunni og minningunum er haldið til haga.

Það var hljóður hópur sem skoðaði safnið ásamt ritara fyrir nokkrum árum og auðfundið var að mönnum var brugðið við að virða fyrir sér raunveruleikann.

Íbúar borgarinnar þurftu að líða ómælanlegar hörmungar af hálfu nasista í umsátrinu langa en sögunni tókst að bjarga sem betur fer, þó svo virðist sem nóg sé til að fólki sem sé tilbúið til að gleyma og jafnvel leggur sig fram um að gleyma.

Og enn er barist og sér ekki fyrir endann á og þar eru m.a. íslenskir fjármunir látnir streyma til stuðnings þeim öflum sem vilja halda ófriðnum við og skiptir þá engu máli þó búið sé að skipta um ríkisstjórn í landinu okkar góða og tiltölulega friðsamlega, þó það hafi ekki alltaf verið svo í sögulegu tilliti.

Fyrrverandi ríkisstjórn með vinstrigrænan forsætisráðherra og ,,grænan" utanríkisráðherra, ruddi slóðina fyrir íslenskan stuðning við ,,heiðursmanna" samfélagið sem ,,stjórnar" Úkraínu.

Við spyrjum hvort til standi að eyða aflafé lítillar þjóðar í fjármögnun stríðsátaka víðar um heiminn?

Það er af nógu að taka, standi vilji íslenskra stjórnmálamanna til þess að styðja og hjálpa til við rekstur drápsliða hverskonar og sé vilji til, geta þeir flengst vítt um heiminn til að sanna ágæti sitt.

,,Allt er það vont og verra en verst", sagði karlinn

Svo virðist sem lítið hafi breyst og við séum á svipuðum slóðum og áður var en maðurinn sem hér var vitnað til, er ekki lengur ofar moldu og þarf því væntanlega ekki lengur að hafa áhyggjur af því sem er að gerast í alþjóðamálunum.

Þar er fyrst til að taka, að ,,vinirnir" tveir sem við sjáum hér að ofan eru ekki vinir í raun og við höfum séð mörg dæmi þar um.

Kínverjar eru með seiglu sinni að skjóta Bandaríkjunum ref fyrir rass á mörgum sviðum og bandarískir ráðamenn, vaxa ekki af stolti yfir seiglu sinni og hæfni vísindamanna sinna, heldur hafa áhyggjur af fjandvinum sínum í Asíu.

  Það hefur löngum verið svo að Bandaríkin hafa viljað ríkja og drottna yfir heimsbyggðinni en það hefur tekist misjafnlega hjá þeim að ná því fram. 

Það er Panamaskurðurinn og meint útþensla Kínverja á því svæði, sem er að trufla, ergja og pirra hina vestrænu vini okkar þessa dagana, vikurnar og mánuðina. 

Það eru ekki lengur fljúgandi furðuhlutir sem eru vandamálið og vel getur verið, að það sé vegna þess að Kínverjar hafi orðið betra vald á veðurbelgjum sínum!

Biden lét skjóta slíkar blöðrur niður og þegar þær voru horfnar af himni tók annað og ekki betra við, því bandarísk ungmenni léku sér með dróna og það var, eða gat verið kínversk hætta!  

Trump ætlar að stilla til friðar í Úkraínu og mun vafalaust gera, því eins og við vitum standa menn alltaf við kosningaloforð sín en þegar hann verður búinn að því, þarf hann að snúa sér að öðru. 

Það hefur nefnilega komið í ljós að Putin hefur tekið upp bandaríska siði, þ.e. útþenslustefnu og vill koma sér upp herstöð í Súdan.

Hvernig honum hefur dottið þessi firra í hug er ekki fyllilega vitað en við gerum ráð fyrir að útvaldir kremlologar finni út úr þessu en vel getur verið, að Putin sé að stefna að því að leggja undir sig heiminn að bandarískum hætti og þeir ættu því að kannast við einkennin. 

Þegar svona er komið í heimspólitíkinni er komið að því að íslenskar utanríkisfígúrur taki höndum saman (enda voru þær einu sinni í sama flokki) og búi til íslenska utanríkispólitík sem miði að því að breyta landinu okkar góða í heimsveldi.

Þær gætu t.d. fengið vin sinn Zelensky í félag við sig og í til þess gert uppistand, sem öllu öðru yrði betra og þá myndi Eyjólfur þ.e. Zelensky, hressast kætast og eflast.

Það hefur sýnt sig að þegar Mörlandar taka upp á arma sína fólk sem líður mátulega vel heima hjá sér og er t.d. þjakað af hlandspennu, þá jafnar það sig snarlega, samanber rússnesku dömurnar sem K.K.R.G. flutti inn en sem þornuðu snarlega upp eftir hingaðkomu sína.

Við getum svo sannarlega látið gott af okkur leiða!

Vitskert veröld...?

Við lifum á undarlegum tímum þar sem því er líkast, sem vitstola menn ráði ríkjum. Setninguna hér á undan er því miður hægt að yfirfæra til ýmsra tíma í mannkynssögunni en það er eitthvað í því sem er að gerast núna sem keyrir um þverbak og gerir bloggara næstum orðlausan. Yfir eitt slíkt dæmi er farið í nokkuð langri grein í miðlinum CNN.COM þar sem farið er yfir stöðu mála gagnvart fólkinu, sem hrakið hefur verið af landi sínu allt frá árinu 1948.

Mynd úr grein CNN

Óreiðukenndur fréttaflutningur hefur borist okkur til eyrna og fyrir augu og staða mála er sú, að framið hefur verið þjóðarmorð á íbúum í Gaza og það er forseti ,,lýðræðisríkisins" Bandaríkjanna sem grípur boltann á lofti og lýsir því yfir, að halda skuli eyðingunni áfram og breyta landinu í einhverskonar sólarströnd fyrir ríkt vesturlandafólk.

Það fólk á samkvæmt mati þess ágæta manns, að njóta ávaxtannna af yfirgangi Ísraels með því að liggja þar í makindum og sóla sig á ströndinni, dreypandi á ljúfum drykkjum og veltandi sér í leti.

Íbúarnir sem þar eru, eiga einfaldlega að fara burtu og koma sér annað og ef einhver hefur haldið að forsetinn sé að bjóða því til Bandaríkjanna, þá veður sá í villu, því höfðingsskapurinn nær ekki svo langt, það eru aðrir sem eiga að sitja uppi með vandann.

Svo uppsker hver sem hann sáir, segir í íslensku orðtaki og Ísraelar eru búnir að sá hatri af miklum móð að undanförnu og svo er að sjá sem þeir séu ekki mjög móðir orðnir, enda vel studdir af gyðingaríkinu stóra og öfluga í Ameríku.

Það er einmitt það ríki, sem ætlar að breyta auðninni sem nú er þakin rústum, í sólarströnd og við gerum ráð fyrir að forsetinn trompaði, hugsi sér að vígja herlegheitin þegar búið er að hreinsa til og byggja upp að nýju.

Það er ekki ofsagt að veröldin sé skrítin þessa dagana.

Trump tók við af manni sem ráfaði um af veikum mætti og var augljóslega orðinn hrumur og lúinn.

Fram fóru kosningar og enginn álitlegur kostur blasti við kjósendum til að kjósa í kosningunum, en ef til vill í von um að Trump stæði við stóru orðin og kæmi á friði í stríði vesturlanda við Rússa, vann hann kosningarnar.

Lítið hefur gerst í því máli a.m.k. enn sem komið er.

Við bíðum og vonum að Eyjólfur hressist og að Trump hinn trompaði, snúi sé að því, að gera það góða sem hann lofaði, varðandi það að stilla til friðar milli fyrrnefndra landa og láti af því, að upplýsa okkur um aðrar undarlegar draumfarir sínar.

,,Ætli ekki sé hægt að fá pillur við þessu", sagði aldraður maður við ritara og fleiri, þegar honum blöskraði á öldinni sem leið.

Miklar framfarir hafa orðið í lyfjagerð síðan þá og ef til vill getur Trump fengið eitthvað við þessu!

Borg er ekki sveit og sveit er ekki borg

Samstarfið í höfuðborginni sem entist ekki eftir að það var komið í hendur Framsóknar.

Það sem sumir reiknuðu með að gæti gerst, hefur gerst.

Dagur B. Eggertsson fyrrverandi borgarstjóri, sýndi hvað í hann er spunnið þann tíma sem hann hélt utan um meirihlutasamstarfið í Reykjavík.

Sýndi að hann réði við verkefnið og að hægt væri að fá fólk úr ýmsum áttum til að vinna saman.

Það þarf sterk bein til að halda saman meirihluta ólíkra stjórnmálaafla og Dagur B. Eggertsson sýndi með störfum sínum að hann býr yfir hæfileikum til að halda mönnum saman, greina kjarnann frá hisminu og láta heildarhagsmuni ganga fyrir sérhagsmunum.

Framsóknarmaðurinn sem tók við, virðist ekki ráða við verkefnið og því fór svo að stjórnarmeirihlutinn í Reykjavíkurborg er sprunginn.

Unnið að því að koma saman nýjum meirihluta sem skv. nýjustu fréttum gengur ekki vel.

Sagt er frá því að fátið sé slíkt að komið hafi fyrir, að menn hafi ekki getað komið sér saman um hve margir kjörnir fulltrúar sitji í borgarstjórninni og þ.a.l. enn síður um hve marga kjörna fulltrúa þurfi til að mynda meirihluta!

Ritari hefur fylgst með Reykjavík síðan hann var ungmenni og annan eins vandræðagang varðandi stjórn borgarinnar og nú er minnist hann ekki að hafa orðið vitni að, nema ef vera kynni í tíð borgarstjóra, sem eitt sinn var í boði Sjálfstæðisflokksins og að hann minnir, eftir að Jón nokkur Gnarr steig af sviðinu.

Það er reyndar ekki við því að búast að flokkur sem í grunninn er flokkur sveitanna og þess framsóknar- íhalds, sem ríkt hefur í málefnum þeirra, hafi grunnfærni til að stjórna borgarsamfélagi.

Um langt skeið var það svo, að Sjálfstæðisflokkurinn stjórnaði Reykjavík og sú ,,stjórn” gekk aðallega út á að mylja undir ,,rétta” og úthluta t.d. lóðum til þeirra sem veifað gátu flokksaðild í Flokknum.

Hverfi hér og annað þar, var aðferðin og eins og komið hefur fram hjá fyrrverandi fulltrúum Flokksins en aðalatriðið var þó það, að hafa skýrteini í Sjálfstæðisflokknum við höndina, þegar sótt var um lóðir.

Því hefur verið breytt og hefur það ekki farið fram hjá þeim sem fylgst hafa með hve það hefur farið í taugarnar á Sjálfstæðismönnum.

Því það sem kallað hefur verið ,,þétting byggðar” hentar þeim ekki, enda augljóslega hagkvæm og skynsamleg stefna!

Hvernig það getur verið eftirsóknarvert og hagkvæmt að byggja eitt hverfi hér og annað þar er ekki augljóst, enda fór það svo að Sjálfstæðismennirnir í höll sinni við Bolholt, sáu hagkvæmnina í því, að byggja meira á lóð sinni og þétta með því byggðina!

Svona geta bestu menn snúið við blaðinu þegar þeim hentar, eða eins og segir í slagaranum ,,bara ef það hentar mér”.

Það kemur í hlut nýrra vanda að sópa upp framsóknar- klúðrið og verður fróðlegt að fylgjast með hvernig það gengur, klúður sem er tilkomið vegna trjágróðurs, sem þarf að fjarlægja.

Vegna flugvallarómyndarinnar í Vatnsmýrinni!

Við viljum, væntanlega flest, höfuðborg þjóðarinnar alls hins besta.

Það gerði borgarstjórinn sem var næst á undan þeim Einari, sem nú stefnir Framsóknarflokknum í enn meiri einsemd en áður var.

Þjóðin fylgist furðu losti með vandræðaganginum.

Breytingar í stjórnmálum og forystu

Pólitíkin er skrýtin tík mun eitt sinn hafa verið sagt og það er ekki ofmælt!

Það hafa verið sviptingar í stjórnmálunum að undanförnu.

Kosið var til alþingis í landinu okkar góða og niðurstaðan varð, að Vinstri grænir gufuðu upp og þótti sumum það vera vonum seinna.

Fylgi við hina stjórnarflokkana varð mun minna en menn þar á bæjum höfðu vonast eftir og það fór svo að Sjálfstæðismenn þurftu að halda sér fast í dyrakarmana á herbergi sínu(?) í Alþingishúsinu til að hafa tilveru sína af.

Framsóknarflokkurinn fékk verðuga refsingu og það svo að menn muna ekki hver er formaður flokksins, ef einhver er!

Hver formaður Framsóknarflokksins er þessa stundina muna fáir, eins og áður sagði og enn færri telja sig það nokkru skipta, svo lengi sem hann kemur hvergi að stjórnartaumum.

Formannaskipti eiga að laga stöðuna en hvort svo verður mun tíminn leiða í ljós en einn vænlegur kandidat er á sviðinu hjá Sjálfstæðisflokknum og verður að segjast að hann, sem reyndar er hún, sem er alls ekki verra, hlýtur að teljast efnilegur formaður, er með reynslu úr atvinnulífinu, hefur góða viðkynningu og er málefnaleg í umræðu.

Vinstri græn er horfin eins og fyrr sagði og við þurfum ekki að hafa áhyggjur af þeim!

Miðflokkurinn er kominn út af Klausturbar og kann það helst í umræðunni að reyna að vera fyndinn og við gerum ráð fyrir að það uppistand muni þróast upp í það að flokknum verði borgið, með því að hann skemmti sjálfum sér það sem eftir er.

Samfylkingin gerði góða kosningu og er tekin við stjórnartaumunum en hvernig það mun gagna með FF&V kemur tíminn til með að leiða í ljós.

Við bíðum og vonum að landinu verði stjórnað af sæmilegu viti, eftir frekar skrýtna tíma í stjórnmálunum undanfarin ár.

Gaspur og hernaður í krafti auðræðis

Hinn nýi forseti Bandaríkjanna slær um sig og slær hinu og þessu fram og við vitum ekki hvort hann er að koma eða fara en hvað sem því líður, þá gegnir hann einu valdamesta embætti sem um getur og því skiptir það máli hvert hann fer í orðræðu sinni og verkum. Hann hyggst stækka Bandaríkin með því að bæta við þau Gaza og gera landsvæðið að baðströnd í eigu Bandaríkjanna. 

Gaza er nokkuð langt frá Bandaríkjunum en það skiptir ekki máli í þessu samhengi, því eins og dæmin sanna má sigrast á vegalengdum og það hafa Bandaríkin gert í yfirgangi sínum í heiminum um langan tíma. 

Afrekin eru nokkur, ef afrek skildi kalla og verða ekki öll talin upp hér en minna má á, að þau eru fyrsta og eina ríkið sem varpað hefur kjarnorkusprengjum á aðra þjóð, þjóð sem sýnt hafði ótrúlegan yfirgang og ósvífni, en fyrr mátti nú fyrr vera!

Þau hafa skilið eftir spor sín til dæmis í Víetnam, Írak og Afganistan og víðar og lagað þar til með sínum sérstaka hætti en stundum gefist upp svo sem Vietnam er gott dæmi þar um, þar sem vart verður enn gengið um landið fyrir huldum jarðsprengjum, þó unnið hafi verið að því að fjarlægja þær í mörg ár.

Vinnan sú hefur kostað lemstrarnir og mannslíf en hvað varðar þá sem þær grófu um það? Og nú stendur til að koma upp baðströnd á Gaza til að ríkt fólk héðan og þaðan að úr heiminum geti notið lífsins!

Til þess að það yrði unnt, voru tugir þúsunda drepnar af gyðingaþjóðinni í einskonar verktöku fyrir ,,lýðræðisríkið" sem svo er kallað, þó réttara væri að kenna það við grímulaust auðræði.

Auðvitað býr fjöldinn allur af ágætisfólki í þessu forysturíki lýðræðisins, sem það er oft kallað, þó réttara væri að kenna það við auðræði en að því sögðu er alls ekki allt svart vestur þar, þó það nú væri!

Ritari hefur verið svo heppinn að hafa ekki reynt nema gott eitt af þeim litlu kynnum sem hann hefur haft af fólki í þessu ríkjasambandi og átti þaðan mágkonu um nokkurra ára skeið eða þar til hún lést langt um aldur fram.

Blessuð sé minning hennar.

Það eru vissulega nokkur handtök sem þarf til að ,,ameríski draumurinn” geti orðið að veruleika á Gaza, en það má sigrast á því með stórvirkum tækjum; grafa minningarnar, rústirnar og líkamsleifarnar og byggja síðan upp glæsihótel fyrir efnað fólk!

Segir Trump, maðurinn sem segir svo margt.

Það getur verið notalegt að dvelja við Miðjarðarhafið eins og við þekkjum mörg og Trump vill af gæsku sinni(!), sjá til þess að við getum notið verunnar þar sem best. 

Allt er þetta af góðum hug sett fram en gallinn er, að sá sem það gerir hefur litla stjórn á sjálfum sér bæði hvað varðar líkamstjáningu og í orðræðu, fyrir nú utan það, að hann veður áfram bæði í orðum og látæði sem líkist helst manni sem búinn er að missa stjórn á sjálfum sér.

Hlutunum er slegið fram og síðan þarf ekki að ræða það meir! 

Forseti Bandaríkjanna bauð Netanyahu í heimsókn og þetta er niðurstaðan úr þeim handaböndum og spjalli sem á milli þeirra fór:

Að Gaza skal verða baðströnd fyrir ríkt fólk og fátæklingarnir sem þar eru og þaðan eru búnir að forða sér skulu koma sér eitthvað annað.   

Kosningar fóru fram í Bandaríkjunum fyrir skömmu eins og við vitum og síðan hefur þeim verið stjórnað með tilskipunum, upphrópunum og yfirlýsingunum.

Eins og ætíð lifum við í voninni um að Eyjólfur, sem í þessu tilfelli er Bandaríkin, hressist og breytist til hins betra, líti yfir farinn veg og haldi sig við það sem hann hefur vel gert og læri af hinu.

Myndin er tekin af vef CNN.

Herbergið setuverkfallið og trillan

Í fjölmiðlum hefur verið greint frá því að Sjálfstæðisflokkurinn eigi voða mikið bágt og eins og við vitum þá má rekja vanlíðanina til slæmrar útkomu flokksins í síðustu kosningum. Herbergið og flokkurinn.

Sjálfstæðisflokkurinn tapaði sem kunnugt er miklu fylgi í vetrarkosningunum sem fram fóru til Alþingis og tapi geta fylgt eftirköst.

Eftirköstin hafa birst með ýmsu móti að undanförnu og enn ein hlið er komin upp á málinu.

Og eftirköst greinilega verið slæm!

Við höfum séð ýmis dæmi um þetta að undanförnu, eins og t.d. framlagamálið, þar sem tekist hefur verið á um greiðslur.

Ekki hárgreiðslur, heldur greiðslur ríkisins til stjórnmálaflokka svo þeim gangi betur að standa straum af starfsemi sinni.

Morgunblaðið var duglegt að fjalla um það mál, eða þar til að vindurinn fór skyndilega minnkandi og svo er komið, að lítið er orðið fjallað um málið í málgagni flokksins, nema ef til vill í herberginu stóra með myndunum óhreyfanlegu á veggjunum.

Ástæða hins skyndi- minnkaða áhuga reyndist vera að í ljós kom að Sjálfstæðisflokkurinn hafði orðið fyrir því að ,,gleyma” að haka í einhvern reit til að eiga rétt á greiðslunum.

Pínlegt var það og pínlegt er það, en svona er það nú samt og menn verða að taka því sem gerist og það gerðu Sjálfstæðismenn, líkt og gerist þegar stungið er gat á blöðru, þá streymir loftið út þar til sami þrýstingur er orðinn utan og innan blöðruveggja.

Eða eitthvað valt og úr því fór allt og síðan er ekki rætt meira um það!

Einhverstaðar verða allir að vera og Sjálfstæðismenn eru eins og kunnugt er íhaldssamir og því verða þeir að fá að vera í sínu gamla herbergi, annars gætu þeir misst haldið.

Hugsum okkur að svo færi að þeir fengju það ekki og það sem myndi gerast þá.

Það sem gæti gerst væri hvorki meira né minna en það, að þeir gætu lent á fundi hjá Samfylkingunni og orðið fyrir vinstra smiti, gerst jafnaðarmenn en ekki ójafnaðar, sem ritari telur reyndar að þeir séu ekki endilega en þó kannski pínu eins og börnin segja!

Ritari hefur kynnst mörgum Sjálfstæðismönnum og ekki reynt þá að því að vera ójafnaðarmenn og jafnvel á köflum hreina jafnaðarmenn.

Framsóknarmenn ættu að vilja sækja fram samkvæmt því sem nafnið segir en þeir geta átt það til að vera afturhvarfsmenn þegar svo ber undir.

Sjálfstæðismenn vilja vera sjálfstæðir a.m.k. stundum en hvort þeir verða sjálfstæðari í réttu herbergi er hreint ekki víst!

Í lokin má svo benda á að myndir má taka niður af veggjum og færa annað þó sjálfstæðar séu!