Kynlíf laxa og pólitík

Það verður víst seint sagt að tíðindalaust sé í íslenskri pólitík.

Við vorum rétt búin að ná andanum, eftir upphlaup matvælaráðherra á miðju sumri, þegar annað ámóta blautt gaus upp eftir að gat hafði komið á laxeldiskví.

Og um það bil þegar þjóðin var við það að jafna sig almennilega á því að lax sé bara lax, hvort sem hann er í kví eða í á, þá tók sig til ráðherra og stökk upp á nef sér vegna hvalveiða.

Hvali má nefnilega ekki veiða né éta og því er það liðin tíð, að fátækt fólk geti keypt sér hvalkjöt, láti það liggja í mjólk og gert úr því góða steik.

Þegar hvalveiðarnar voru komnar ,,í steik" og laxeldismálin líka, var flett ofan af því sem allir vissu, sem vita vildu, að laxar ýmissa stofna finnast í laxveiðiám vítt um veröld og þar á meðal í Kanada.

Og þar er kynþáttarígurinn í laxheimum slíkur, að þeim dettur ekki í kvarnir, að blanda svilum sínum sama við önnur hrogn en þau sem tilheyra réttum stofni.

Það næsta sem við komum til með að frétta af málinu verður eflaust, að til standi að kæra kanadíska laxa fyrir kynþáttamismunun í laxísku kynlífi og þegar svo er komið, fer að verða athugandi fyrir laxmenn af vinstrigrænum stofni hvort ekki þurfi að fara að laxera.

Þessi mál eru ekki til lykta leidd en nú er komið upp annað mál og mun alvarlegra.

Formaður Sjálfstæðisflokksins, sem í raun hefur leitt ríkisstjórnina í gegnum þær hremmingar sem hér voru fyrr nefndar, komst í þá stöðu, vegna kaupa föður hans á hlutabréfum í Íslandsbanka, að sonurinn sá sér ekki annað fært en að segja af sér ráðherrastöðunni.

Þjóðin fjárglaða, er sem sagt án fjármálaráðherra og þannig getur ,,stjórn" fjármála ekki verið, hvað sem mönnum kann annars að finnast um, hvernig haldið hafi verið á þeim málum.

Hver kemur til með að stjórna (ó?)stjórninni þegar Bjarna nýtur ekki lengur við, er ekki vitað en hitt er ljóst, að það verður ekki öfundsvert hlutverk í að komast og enginn innan stjórnarinnar sýnist vera vænlegur né vænleg, til að valda verkefninu.

,,Umboðamaður segir Bjarna hafa brostið hæfi", hvað varðar margnefnda bankasölu og lítil ástæða er til að efast um að það sé rétt, svo tengdir sem Bjarni og faðir hans eru. Umboðsmaður gaf út ,,Álit umboðsmanns" og þeir sem gaman hafa af lestri slíkra gagna geta liðkað sig í lestri með lestri þess.

Við hin látum okkur nægja að fylgjast með dramatíkinni í pólitíkinni og vitum það eitt, að ekki batnar ríkisstjórnin við það, að Bjarni Benediktsson hverfi úr henni.

,,Bjarni segir af sér", segir í fréttum og þjóðin heldur niðri í sér andanum og veltir fyrir sér hver komi til með að stjórna landinu, vitandi að enginn af núverandi ráðherrum er líklegur til að ráða við hlutverkið.

Flogið hefur fyrir, að núverandi forsætisráðherra fái nýtt hlutverk og fundinn verði annar í hennar stað.

Gott er að hafa eitthvað í innlendum fréttum, en okkur er ekki alveg sama um hvað það er, hvernig það ber að, né hvernig niðurstaðan verður.

Stríðið milli Ísraels og Palestínu... og grillið

Í einni af X færslunum sem hér er með í mynd sem fengin er úr umfjöllun The ZeroHedge, er sagt frá því, að verið sé að halda grillveislu í Hvíta húsinu í Washington.

Ró Bidens er þar með orðin dálítið stóísk, ef ekki forskrúfuð, og af því má ráða að átakasvæðið sé bæði ,,hinumegin" og langtíburtistan frá því bandaríska grill- partíi.

Það sama má segja um átökin um Donbas milli Rússlands og Úkraínu, að allt er þetta talsvert fjarri Bandaríkjunum.

 

Biden er sem sagt nefndur til sögunnar á X- inu, ekki í fyrsta skiptið og vafalaust ekki það síðasta.

Biden er svangur líkt og flestir geta orðið og því er grillað og það er ekki verið að grilla ofan í hundinn, því hann er útlægur orðinn og  búið að gera hann brottrækan.

Svengd Bidens - sé þarna rétt með farið - gæti stafað af því, að hann hafi þurft að taka ákvörðun um að senda ,,stærsta flugvélamóðurskip í heimi" inn í botn Miðjarðarhafs eins og það var kallað - svo ekki verði um misskilning að ræða, þá er rétt að taka fram að skipið er ósokkið og ekki á botni hafsins - en í Miðjarðarhafi á það að vera fyrst um sinn, til að það sé til taks ef þörf gerist.

Ástandið er sem sagt slæmt og búið að fara talsvert illa en vel getur verið að beinið sem Biden nagar í veislunni setji af stað einhverjar jákvæðar hugrenningar.

Allt er þetta samt Palestínumönnum að kenna, því þeir kunna ekki að meta það að vera reknir af landi sínu og hrúgað inn í ,,getto".

Getto muna gyðingar úr sinni sögu og vita því vel, að ekki má setja fólk í slíka andstyggðar aðstöðu, að minnsta kosti ekki gyðinga, en ýmsir hafa velt því fyrir sér hvort svo muni einnig gilda um aðra, að mati yfirvalda í Ísrael.

Palestínumenn eru þeirrar skoðunar að landrán og aflokun sé vond fyrir þá sem aðra og eiga erfitt með að skilja, hvers vegna þeir eiga að gefa eftir allt sitt land og lífsviðurværi, til að gyðingar geti búið í ,,sínu" landi, eða því sem þeir líta á sem sitt land.

Það er sem sagt ekki rými fyrir báðar þjóðir á svæðinu og báðar þjóðirnar líta á landið sem ,,sitt land", fyrir utan trúarlegan ágreining og menningarmun og því er sem er.

Og allt var þetta búið til af hinum vestrænu vinum, sem voru í losti sem von var, eftir framferði nasista í seinni heimstyrjöldinni.

Að bæta hag eins á kostnað annars, er oftar en ekki vond lausn og síst af öllu er lausn af því tagi góð, þegar um er að ræða sjálfa tilveru lífsins.

Ekki bætir síðan úr, ef sýnin á lífið og sjálfa tilveruna er þar að auki gjörólík. Við búum við vanda sem búinn var til í fortíð og brýst út í nútíð og á þeim vanda þarf að finnast raunhæf lausn.

Þau sem lausnina finna ættu að njóta friðarverðlauna, því við núverandi ástand er ekki hægt að búa fyrir þau sem í súpunni sitja og sem flest hafa ekki unnnið til þess, að búa við hörmungar af þessu tagi.

Kúgun er ekki lausn

Svo er sagt að um átta milljónir Palistínuaraba búi að svæði sem er samsvarandi Reykjavík og Kópavogi að stærð.

Íslenska þjóðin mun vera að nálgast fjögur hundruð þúsund á landinu öllu, svo samanburðurinn er nær óskiljanlegur.

Meðferðin á Gyðingaþjóðinni í heimstyrjöldinni síðari er flestum kunn og því er það sorglegt að það skuli vera sú þjóð, sem stendur fyrir stöðugu landráni og yfirgangi gagnvart þeim sem í landinu búa; eru þar fyrir og hafa verið um aldir.

Líklega hefur stofnun Ísraelsríkis verið mistök sem gerð voru vegna þess hve andstyggilegar hörmungar gyðingar höfðu þurft að þola og að heimsbyggðin var í áfalli vegna þess sem upplýstist að styrjöldinni lokinni.

Það sem þar opinberaðist var svo yfirþyrmandi að mönnum lá á, að bæta fyrir það sem gerst hafði, en sást yfir að það þurfti ekki að gera með því að ræna landi af annarri þjóð og setja hana á vergang. Sást yfir að það væri farsæl lausn.

Þeir einir báru ábyrgð á ,,helförinni" sem að henni stóðu og vel hefði verið hægt að búa svo um hnúta, að gyðingar hefðu einfaldlega sinn rétt þar sem þeir voru; hefðu sama rétt og aðrir þjóðfélagsþegnar í samfélögunum sem risu upp úr rústum styrjaldarinnar.

Sú leið var ekki farin, heldur var valin sú leið, að hrekja á brott þau sem bjuggu í landinu. Landinu sem menn telja vera Ísrael.

Þau áttu að fara ,,eitthvað annað" en hvert, var ekki tilgreint, en nokkuð augljóst er, að lönd araba áttu að sitja uppi með vandann.

Það fór svo, að þjóðir Evrópu ákváðu að losa sig við Gyðingaþjóðina, koma henni af sér til annarra og láta þeim eftir að glíma við vandann.

Vond voru þeirra ráð og vont var þeirra réttlæti og framtíðarhugsunin engin önnur en sú, að líklega myndi þetta nú allt blessast einhvernvegin.

Og höfðinu var ,,stungið í sandinn".

Þegar allt virðist vera tapað og engin von er eftir, grípa menn til örþrifaráða.

Þannig hefur það alltaf verða og mun alltaf verða og því ætti að forðast að koma fólki í slíka stöðu.

Afleiðingarnar geta orðið hrikalegar og við sjáum hverjir stíga fram á sviðið og/eða eru dregnir þar fram.

Það eru ekki neinir sérstakið friðarpostular sem við sjáum tjá sig um málin og fregnir hafa borist af því að Bandaríkjamenn ætli að leysa málið á sinn hátt:

Stærsta flugmóðurskip heimsins mun vera á leið á vettvang!

Hryllingssögur úr fortíðinni

Flett hefur verið  ofan af dapurlegri fortíð að undanförnu, fortíð sem gera má ráð fyrir að þeir sem að stóðu vilji gleyma og grafa, enda það sem gert var sannarlega frekar óhugnanlegt.

Börn voru geymd á stofnun og með þau farið eins og um skynlausar skepnur væri að ræða og jafnvel verra en það, því flest viljum við sýna dýrunum sem við höfum undir höndum umhyggju og alúð.

Það var ekki gert og börnin meðhöndluð líkast því sem um dauða hluti væri að ræða, eða í besta falli dýr, sem varasamt væri að snerta nema sem allra minnst, því snertingin gæti skemmt!

Þessu virðast menn hafa trúað og sem dæmi mátti ekki gefa börnunum að borða öðruvísi en að mata þau aftan frá til að tryggt væri að ekki myndaðist augnsamband milli þess sem mokaði matnum í munninn og barnsins sem verið var að næra.

Lýsingarnar hafa verið óhugnanlegar, bæði í sjónvarpi og í öðrum fjölmiðlum.

Heimildin hefur t.d. birt nokkrar greinar að undanförnu um málið og þar kennir ýmissa grasa ef svo má segja.

Í grein sem Steinþór Grétar Jónsson ritaði í Heimildina þann 21. júlí 2022 segir frá því að ,,Borgarráð [hafi] samþykkti á fundi sínum [...] að skipa nefnd um heildstæða athugun á starfsemi vöggustofu að Hlíðarenda og Vöggustofu Thorvaldsenfélagsins".

Í ljós kemur að það var sannarlega ekki vanþörf á.

Niðurstöður rannsóknarinnar hafa verið að koma fram í fjölmiðlum og t.d. Ragnhildur Þrastardóttir, ritar um málið í Heimildina 5/10/2023 og greinir frá því að foreldrum hafi verið ,,meinað að umgangast börn sín á meðan þau voru á vöggustofunni".

Þá segir þar, að foreldrum hafi verið bannað að snerta börn sín og þar af leiðandi, ekki mátt halda á þeim og er vísað til skýrslu nefndar sem var falið það verkefni að rannsaka málið.

Í henni segir ,,að tengsl við foreldri voru alfarið rofin".

Tilgangurinn var sem sé að slíta tengsl foreldra og barna og gera það bæði vel og vandlega!

Svipuð saga er sögð af ,,vöggustofu THorvaldsenfélagsins".

Í grein Sunnu Óskar Logadóttur segir í upphafi:

,,Ekki mátti taka börnin upp og hugga þau. Ekki mátti horfa í augun á börnunum þegar þeim var gefið að borða og það mátti alls ekki leika við þau. Rík áhersla var á að starfsmenn mynduðu ekki augnsamband því það myndi valda börnunum svo mikilli sorg. ,,Ekki mátti heldur taka sængina af börnunum í heimsóknartíma og starfsstúlkum sagt að snúa baki í mæðurnar."

Hvað því fólki sem setti reglurnar hafur gengið til er ekki gott að segja og sögurnar eru óhugnanlegar.

Það sem ekki mátti gera:

,,Starfsmenn máttu ekki mynda augnsamband, ekki mátti heldur taka sængina af börnunum í heimsóknartíma og starfsstúlkum sagt að snúa baki í mæðurnar."

Börnin áttu sem sagt mæður, en þær máttu ekki eiga eðlileg samskipti við börnin sín!

Líklegt er að aðstæður mæðranna hafi ekki verið sérlega góðar og öruggt má telja að hin ómanneskjulega framkoma sem þeim og börnum þeirra var sýnd hafi aukið enn á vanlíðanina, í stað þess að bæta.

Það er gott að það sé búið að fletta ofan af málinu, vítin eru til að varast og tryggja þarf að annað eins og þarna hefur verið sagt frá, endurtaki sig aldrei aftur.

Hundsbit, veggjald, snuprur, vextir og brottvísanir

Biden heitir karlinn og er óbitinn eftir því sem best er vitað, en hvort hann er bitur vitum við ekki, en það gengur á ýmsu.

Svo langt er gengið, að í fréttum Útvarps allra landsmanna, var sagt frá því að besti vinur og ráðgjafi(?) forsetans í Bandaríkjunum hundinum Commander, hafi verið komið fyrir á ónefndum stað, væntanlega í þeirri von að þar verði enginn fyrir biti.

Hundurinn er sá annar í röðinni sem sendur er á brott frá þeim forsetahjónunum.

Forsetahjónin kenna um streituvaldandi umhverfi hins Hvíta húss og af því má ráða, að hvuttarnir hafi ekki ráðið við álagið sem verunni í húsinu fylgir.

Samkvæmt orðabókinni þýðir nafn hundsins leiðtogi, yfirmaður eða eitthvað í þá veru, sem þá er væntanlega yfirhundur í þessu tilfelli, því ekki hafa borist af því neinar fréttir að hvutti hafi breyst í mann.

Eigandinn virðist á stundum ekki vita hvort hann er að koma eða fara, svo ekki er ólíklegt að Commanderinn hafi tekið til sinna ráða og reynt að vísa húsbónda(?) sínum veginn og hafi svo verið, hefur sannarlega ekki veitt af.

Húsbóndinn, hinn óbitni(?) Biden hefur verið í brasi um nokkurn tíma, staðið í stríðsrekstri, með baldinn verktaka, sem rámur rymur og það svo að öldungnum í Hvíta húsinu er vorkunn, þó hann nái ekki öllu sem úr þeim hálsi berst.

Enda fór svo að uppvíst er orðið, að farið sé að sneyðast um í  vopnabúrum.

Gæti þar með verið kominn fram nýr starfavettvangur fyrir Commanderinn, sem gæti annað hvort tekið að sér að stjórna Bandaríkjunum fyrir Biden og líka Zelensky, fyrst sá síðarnefndi er ekki fær um að stjórna Úkraínu nema í hjáverkum.

Hér heima á ísa köldu landi, er allt miklu hversdagslegra.

Fjármálaráðherra leggur til að af rafbílum verði innheimt gjald, líkt og gert er á öðrum bifreiðum og þó það sé hversdagslegt, eru rekin upp ramakvein af hálfu þeirra sem telja eðlilegast að aðrir en þeir sjálfir greiði fyrir notkun þjóðveganna. 

Þeir telja bæði sjálfsagt og eðlilegt að eingöngu sé greitt veggjald af bifreiðum sem brenna bensíni og gasolíu.

Niðurstaða ferðafrömuðanna, sem hér eiga hlut að máli, er að slík gjaldtaka, muni auka líkur á að orkuskiptin fari í vaskinn!

Af þessu má ráða að málið er viðkvæmt, rafbílarnir líka og raunverulegur grundvöllur virðist enginn undir atvinnuveginum og verður fróðlegt að fylgjast með, hvort almennt verður tekið undir þessi orð þar á bæ.

Hvort rafbílavæðing þjóðarinnar er líkleg til að lukkast, er reyndar ekki líklegt og bloggara hefur borist til eyrna, að þegar hafi sést menn á ferð um landið með bensínknúnar rafstöðvar sér til bjargar, til að hlaða bíla sína á ferðalögum.

Sé það rétt, blasir við að dæmið gengur ekki upp og kyrrðin og rómantíkin við tjaldútileguna verður lítil, með urrandi rafstöðvar við höfðalagið.

Að telja það sjálfsagt og eðlilegt að vera undanþeginn því að greiða veggjald til samfélagsins og ætla það öðrum, er viðhorf sem þarfnast skýringar svo ekki sé meira sagt.

Af Íslandi er það annars að frétta að ráðherra snupraði annan slíkan á opinberum vettvangi og sagði sem svo: ,,„Ég gæti líka rætt samnefnarann yfir þetta flest. Svandísi Svavarsdóttur sem situr með mér í ríkisstjórninni, ríkisstjórninni sem þið auðvitað elskið öll svo heitt og innilega. Um hana get ég sagt eitt, semsagt ríkisstjórnina ekki Svandísi: Þessi ríkisstjórn er skárri með Sjálfstæðisflokkinn í honum en án hans,“"

Það er sem sagt farið að hvessa dálítið við ríkisstjórnarborðið og skal engan undra eins og framganga vinstrigræningjanna hefur verið. 

Vextir sliga, ef háir eru og í Svörtuloftum er stefnt að því að hafa þá svo háa að bíti og því er ekki ólíklegt að hundur Bidens geti fengið vist í þeim glæsilegu húsakynnum sem þar eru.

Verði það úr, þá er óskandi að honum verði valinn staður við dyr peningaskápsins og úthlutað þar því hlutverki að bíta niður verðbólgudrauginn.

Geta þá stjórar og ráðgjafar gengið til annarra starfa, en þeirra að berjast við draug sem þeir kunna ekki að kveða niður.

Eins og við vitum er Biden óbitinn, þó blankur sé orðinn og krankur dálítið og hver veit nema að hann hressist og gangi í endurnýjun lífdaganna, fái íslenski verðbólgudraugurinn hundslega meðferð, fyrir tilstuðlan hins bitglaða hunds. 

 

Messan innlitið og járnið

Fyrrverandi formaður Framsóknarflokksins og landbúnaðarráðherra segir ferðaþjónustuna vera að drepa íslenskan landbúnað.

Ekki er það ofát á landbúnaðarvörum sem því veldur, eftir því sem komist verður næst, en formaðurinn og ráðherrann fyrrverandi, segir Framsóknarflokkinn hafa miklar áhyggjur af stöðunni og eftir honum er haft orðrétt:

,,„Ég bara skora á ríkisstjórnina að bretta upp ermar og opna augun og gera sér grein fyrir því að matvælalandið Ísland, við erum að tapa því út úr höndunum ef þeir ekki taka stórt á núna,” 

Bragð er að þá barnið finnur segir einhverstaðar og því rengjum við ekki orðin. Við eru að tapa matvælalandinu Íslandi úr höndum okkar segir Guðni og rétt er að koma því á framfæri, að það er ekki vegna ofáts á þeim landbúnaðarvörum sem framleiddar eru í landinu.

Í fréttinni sem birtist á visir.is er eftirfarandi hvatning höfð eftir Guðna:

,,„Stjórnmálamennirnir verða að vakna og gera sér grein fyrir því að þetta er atvinnuvegur, sem lifir eða deyr hvort sem þeir taka á. Þeir halda utan um búvörusamningana, utan um tollamálin, utan um verðlagninguna, þannig að þeir koma að þessu öllu og þeir geta ekki verið stikkfrí.”"

Guðni segist hafa orðið fyrir vonbrigðum með Svandísi Svavarsdóttur og er hann ekki einn um það, ef að líkum lætur.

Eftirfarandi er haft eftir formanninum fyrrverandi:

,,„Ferðaþjónustan átti að bjarga hér landsbyggðinni. Nú er ferðaþjónustan, sem ferðamaðurinn vill njóta. Nú er hún að drepa landbúnaðinn. Það er auðvelt að hætta og loka fjósinu og breyta því bara í gistihús. Þetta er bara alvarlegt mál eins og oft koma á borð þessarar þjóðar.""

Það næsta sem við fréttum af ráðherranum fyrrverandi, er að hann er kominn á kjördæmisþing Samfylkingarinnar - sem gestur - og virðist kunna vel við sig á þeim stað, enda Samfylkingin komin með 30% fylgi á meðan Framsóknarflokkurinn er í 8 prósentum eftir því sem segir í Morgunblaðinu.

Ekki fylgir sögunni að Guðni sé genginn í Samfylkinguna, en straumur fylgisins liggur þangað og er það ekki að undra, sé tekið mið af hvernig ríkisstjórn allra(?) pólitískra átta hefur haldið á spilunum.

Má þar nefna, auk þess sem hér hefur verið nefnt, innflytjendamál, hvalveiðimál, utanríkismál og orkumál, að ógleymdu dekri við rafbíla, sem virðast svífa ofar vegum að mati ríkisstjórnarinnar.

Með þeirri undantekningu, að fjármálaráðherrann virðist gera sér grein fyrir, að allt kostar sem nýtt er og að það gildir jafnt um rafbíla sem aðra bíla, að þeir slíta vegunum, en þar talar hann fyrir daufum eyrum félaga sinna í ríkisstjórnarsambræðingnum.

Félagarnir muna ekki hve rafmagnsstraujárnið getur verið þungt!

Sjómannaskólinn?

Í Morgunblaðinu í dag er frétt, sem ef til vill lætur lítið yfir sér, en segir þó frá því, að til standi af hálfu yfirvalda að útvista skólunum  sem verið hafa fyrir Skipstjórnarmenn og Vélstjórnar, úr Sjómannaskólahúsinu.

Í stað þess að þar verði menntaðir Vélfræðingar, vélstjórar og Skipstjórnarmenn, mun vera ætlunin að flytja menntun þeirra stétta á brott frá Reykjavík, eða svo er látið í veðri vaka.

Í þeirra stað er sagt að til standi að hýsa þar dómstóla landsins.

Reyndar er svo komið að ,,háskólar" eru komnir ,,út á land" en hvort til stendur að koma þeim þaðan til Reykjavíkur er  ekki vitað. Raddir hafa heyrst sem segja að háskólar út á landi séu ekki nógu góðir en einnig er svo, að sumum þykir sem menntun lögreglumanna sé dálítið afskekkt á Akureyri svo dæmi sé tekið.

Verði niðurstaðan sú, að útvista menntun þeirri sem hér var nefnd í upphafi frá Reykjavík og til annarra sveitarfélaga má segja að það sé enn eitt skrefið í þá átt að flytja námsaðstöðu úr höfuðborginni.

Verði það síðan einnig niðurstaðan, að leggja af háskólann og koma honum út á landsbyggðina, að þá sé skrefið stigið til fulls og hótelhaldarar landsins geti að því loknu farið að taka danssporin!

Vonandi verður ekkert af þessu og sé það rétt sem hvíslað hefur verið, að alls ekki standi til að flytja í dómstóla í Sjómannaskólann, heldur breyta honum í hótel, þá ættu menn að hugsa til þess að það er til fleira en ferðamennska.

Sjómannaskólinn hefur hýst kennslu þeirra sem stefnt hafa að því að starfa á sjó, þ.e. skipstjórnarmenn og vélstjórnar, auk þess sem ritari telur sig muna til þess að þar hafi verið kennsla fyrir loftskeytamenn og eitthver aðstaða var fyrir fleiri s.s. meinatækna a.m.k. um einhvern tíma.

Og ekki þótti okkur strákunum leiðinlegt að sjá hinu fagra kyni (meinatæknana) bregða fyrir, þegar við fórum sömu leið og þær en í sitthvora stofuna: þær til að nema sín fræði en við í efnafræðistofu þar við hliðina! 

Nú er samkvæmt því sem segir í textanum hér að neðan (úr Morgunblaðinu) svo komið að skipstjórnarmenn hafa þungar áhyggjur af málinu og er það að vonum.

Það mun vera héraðsdómur Reykjavíkur og Reykjaness sem flytja eiga í húsnæðið sem hýst hefur sjómannastéttina.

Enda þarf þjóð sem lifir ekki lengur á því að sigla um höfin til að afla verðmæta í þjóðarbúið og sigla síðan með verðmætin að heiman og heim, ekki húsnæði lengur til að afla sér þekkingar.

Framtíðin í þeim atvinnuvegum mun eflaust felast í því að bjóða fiskveiðar við landið út á alþjóðlegum markaði sem og flutningana líka og þegar svo er komið, þarf ekki lengur að vera til menntuð sjómannastétt í landinu.

Þá má einnig gera ráð fyrir að stutt sé í að nýting sjávarnytja hverskonar verði bönnuð, enda hafið ekki ætlað til þess að veitt sé í því, a.m.k. ekki við Ísland.

Því á Íslandi munu menn finna sér starfa við að dæma mann og annan fyrir það sem þeir hafa gert, eða ekki gert.

Hér að neðan sjáum við að Félag skipstjórnarmanna hefur áhyggjur af málinu og það hefur sent frá sér yfirlýsingu vegna þess. Yfirlýsing þeirra er hér að neðan óstytt frá því sem hún var í Morgunblaðinu: 

,,Fé­lags­menn í Fé­lagi skip­stjórn­ar­manna hafa þung­ar áhyggj­ur af gæðum skip­stjórn­ar­náms og sjáv­ar­út­veg­stengdra greina í dag. Flagg­skip mennt­un­ar sjáv­ar­út­vegs­ins, Sjó­manna­skóla­húsið við Há­teigs­veg, hýs­ir nú Tækni­skól­ann og nú séu jafn­vel uppi hug­mynd­ir um að taka þetta sögu­fræga hús og færa Héraðsdóm­stól­um Reykja­vík­ur og Reykja­ness, sem væri hneisa að mati fé­lags­manna og miklu nær að líta til Hegn­ing­ar­húss­ins á Skóla­vörðustíg fyr­ir dóm­stóla.

Fé­lag skip­stjórn­ar­manna hef­ur sent stjórn­völd­um álykt­un um málið þar sem þeir skora á stjórn­völd að stofnaður verði Skóli sjáv­ar­út­vegs og sigl­inga á Íslandi þar sem kraft­ur verði sett­ur í grunn­nám skip- og vél­stjórn­ar með mögu­leika á há­skóla­námi í sjáv­ar­út­vegs- og fisk­eld­is­fræði. Slík­ur skóli gæti þó ekki verið í sam­búð við fjöl­marg­ar grein­ar í Tækni­skól­an­um enda sé skip­stjórn­ar- og vél­stjóra­mennt­un nú þegar horn­reka í hinum forn­fræga Sjó­manna­skóla, sem ætti að end­ur­heimta stöðu sína í mennt­un í sjáv­ar­út­vegs­grein­um eins og þegar hann leysti Gamla stýri­manna­skól­ann á Öldu­götu af hólmi 1945.

Nýr skóli ætti að vera í góðu sam­starfi við lands­byggðina og halda nám­skeið, efla ný­sköp­un, leita eft­ir sam­vinnu við t.d. Fisk­tækni­skól­ann í Grinda­vík og Haf­rann­sókna­stofn­un og þá gætu vannýtt skip stofn­un­ar­inn­ar komið sér vel."

Föstudagstrall og dinglumdangl

Samkvæmt því sem lesa má í morgunsárið á visir.is er ríkisstjórn Íslands farin í frí, lögst útaf, eða komin upp á heiðar, á gæsaskytterí eða rjúpna, enda haust samkvæmt dagatalinu.

Dagatalið segir eitt en fréttir í dagblöðum, bæði á pappír og rafrænt segja annað.

Þingmaðurinn sem tjáir sig á visi.is er úr Samfylkingunni, sem ekki á aðild að ríkisstjórninni og þingmaðurinn saknar samt stjórnarinnar sem virðist vera farin frá, eða a.m.k. ekki vera ein heild og þegar að er gáð ætti það ekki að koma neinum á óvart.

Hjá ríkisstjórninni er bara hlegið og trallað, dútlað og dinglumdanglast, segir þingmaðurinn!

Við tökum ekki undir þetta, því innan ríkisstjórnarinnar hefur verið ýmislegt að gerast.

Einn vill veita því fólki skattafslátt sem eyðir peningunum sínum í fjölmiðla.

Annar eða fleiri vilja veiða hvali, en þá sprettur fram hvalavinur mikill í kvalræðiskasti, innan ríkisstjórnarinnar og stöðvar veiðar, - sem reyndar eru ekki byrjaðar - í krafti þess að best sé að hafa tímann fyrir sér, eigi eitthvað að gera og að betra sé að gera illt, en ekki neitt.

Okkur verður hugsað til stráksins Láka, en það passar frekar illa þar sem ráðherrann er kona, þrátt fyrir að vera herra og alls ekki saklaus stelpuhnokki lengur, en samt saklaus af því að skjóta hvali.

Þriðji ráðherrann vill virkja vatnsföll þjóðinni til hagsbóta en þá sprettur fram nefndarómynd út úr einhverju rykugu skúmaskoti og ógildir þá ákvörðun.

Innviðaráðherra finnst vera komið nóg af innviðum og dómsmálaráðherra og fleiri hafa komist að því, eftir ítarlega skoðun, að það hljóti að vera svo, að flóttamenn sem til landsins koma, komi alls ekki til landsins, heldur einhvers sveitarfélags, sem þau hafi valið sér og þar skuli þau því vera.

Landið er sem sagt stjórnlaust í nafni frelsisins og senn kemur að því, að við gerum, framsóknar- BARA og síðan það eitt sem okkur sýnist, og þegar okkur sýnist vera best að gera það...bara.

Eða, gerum ekki neitt, í þeirri trú að hægt sé að lifa á skattaafslætti, í boði þjóðarinnar og Framsóknar, sem sækir þar með fram með nýjum hætti.

 

Borgarlína, Hvalfjarðargöng o.fl.

Dagur B. Eggertsson rifjar m.a. upp hvernig var með göngin undir Hvalfjörð í færslu sem hann birti á Facebook og ritar eftirfarandi:

,, Því er slegið upp í gær að 36% fólks segjast andvíg Borgarlinu. Það er auðvitað frétt og heldur meiri andstaða en áður. Aðalpunkturinn er þó væntanlega sá að samkvæmt sömu könnun eru 64% að sama skapi hlynnt eða "í meðallagi" hlynnt Borgarlínu. Það er reyndar býsna góður stuðningur miðað við hvað hamast er gegn þessu þjóðþrifamáli. Ekkert annað verkefni skiptir meira máli til að létta á umferðinni á höfuðborgarsvæðinu. Reykvíkingar styðja verkefnið meira en aðrir 48% þeirra eru hlynntir eða mjög hlynntir Borgarlínu og 20% að auki eru miðlungs hlynntir eða 70% alls. Stuðningsfólk allra flokka meirihlutans i Reykjavík styðja verkefnið sterkt."

Hann rifjar upp andstöðuna sem var við gerð ganganna undir Hvalfjörð en þá voru úrtöluraddir á kreiki.

Niðurstaðan varð samt sú, að göngin voru gerð og enginn myndi vilja troða upp í þau núna!

Flestar samgöngubætur sem gerðar hafa verið hafa gefist vel, þó setja megi spurningarmerki við Borgarfjarðarbrúna og Vaðlaheiðargöngin og segja sem svo að fara hefði átt aðra leið með það fyrrnefnda og sleppa hinu síðara.

Um það þýðir ekki að fjasa úr því sem komið er og eins og venjulega verður að horfa fram á veg, þó gott geti verið að líta til baka til að læra af mistökum sem gerð hafa verið.

Þingmenn úr Sjálfstæðisflokknum munu hafa vakið máls á því nýlega að gott gæti verið að gera uppbyggðan veg með bundnu slitlagi yfir Kjöl.

Menn ættu að skoða þær hugmyndir með jákvæðu hugarfari; skoða kosti og galla, vega og meta og ef niðurstaðan verður sú að rétt sé að gera raunverulegan veg yfir Kjöl, þá er bara, að hætta að tala og snúa sér að því að gera og viti menn:

Þegar vegurinn verður kominn, þá myndu allir vilja Lilju kveðið hafa! 

Myndirnar hér til hliðar eru úr færslu Dags og munu vera teikningar af Borgarlínu.

Það er sem glitti í Laugardalshöllina á þeirri efstu.

Hvað er þar fyrir neðan, verður hver sem skoðar að dæma fyrir sig.

Ritari er ekki vel inn í hugmyndunum um verkefnið og treystir sér ekki til að skýra það sem er á litlu myndunum.

Sjá má samt, að huggulegt er það alla vega og á þeirri mynd sem er lengst til vinstri er almenningsvagn einhverrar gerðar, á þeirri næstu reisulegar byggingar og lengst til hægri er horft út um glugga til að virða fyrir sér útsýnið.

Við lifum í tölvuheimum, sem ekki voru til þegar Hvalfjarðargöngin voru hönnuð og það er ýmislegt hægt að gera, til að fólk sjái fyrir sér útkomu framkvæmda sem verið er að ræða um, en ekki eru orðnar að veruleika.   

FFH? nei en fljúgandi og verri

Það hefur verið haft fyrir satt, að gott sé að eiga góða að þegar á þarf að halda.

Í The Guardian er saga af því og í ljós kemur að hið gamla spakmæli ,,að peningar séu afl þeirra hluta sem gera þarf", er í fullu gildi.

Það er kunnara en frá þarf að segja, að viðskiptabann er við Rússland vegna stríðsins í Úkraínu frá mörgum ,,góðum" löndum en samt ekki öllum og það er vel hægt að komast framhjá því banni, ef vilji stendur til.

Við höfum heyrt af að Rússar kaupi það sem þeir þurfa, frá löndum sem ekki eru í hópi ,,hinna heilögu" ef svo má segja, löndum eins og Íran og fleiri, en það sem hér er til umræðu eru drónakaup Rússa frá Íran og við skoðun kemur í ljós, að ýmislegt getur leynst í hinni heilögu viðskiptakú.

Drónar eru búnir til úr ýmsum einingum eins og nærri má geta og þar á meðal ýmsum hálfleiðurum og ótal fleiru, auk þess sem þeir eru þeirrar náttúru, að þeim er nákvæmlega sama um hvort þeir eru skotnir niður eða ekki, eða við gerum a.m.k. ráð fyrir því.

Þeir eru s.s. steindauðir, þó þeir séu bráðlifandi þannig séð; fjarstýrð og forrituð tækniundur og framleiddir til að valda gagnaðila í styrjöld skaða, án þess að hætta þurfi mannslífum árásaraðilans til að gera árásina.

Nú liggur það fyrir, samkvæmt því sem segir í The Guardian, að írönsku drónarnir eru stútfullir af íhlutum sem framleiddir eru í vestrinu, þ.e. löndunum sem telja sér skylt að standa með Úkraínu í yfirstandandi átökum.

Gera það svo staðfastlega að heiðraðir eru gamlir nasískir stríðsglæpamenn úr seinni heimsstyrjöldinni í þeirri, trú að þeir séu nú góðir samt, fyrst þeir hafi vilja berja á Rússum!

Allt er það nú annað mál og í besta lagi pínlegt og bera helst vitni um að sögufræðsla viðkomandi Kanadamanns hefur verið eitthvað brotakennd.

Peningar eru eins og við vitum, afl þeirra hluta sem gera skal og nú er sem  sagt komið í ljós að í NATO og ESB löndum er búið til, það sem þarf í drónana, sem koma fá Íran og fara til Úkraínu, en með viðkomu í Rússlandi.

Þetta er gert í krafti þess að allir þurfi nú að fá sitt, framleiðendur íhlutanna, Íranir, Rússar og Úkraínar, en við gerum ráð fyrir að sá síðasttaldi, þ.e. landið sem engt hefur til ófriðar árum saman á Donbas svæðinu, hafi alls ekki óskað eftir sendingunni!

Hvað sem því líður, þá halda ekki girðingarnar sem áttu að tryggja að íhlutir fengjust ekki í óvættina.