Flugvélar framtíðarinnar.

Það er ekki erfitt að taka undir það sem franski fjármálaráðherrann Bruno Le Maire segir:

„Það er engin ástæða til að fljúga þegar hægt er að ferðast með lest á skemmri tíma en tveimur og hálfum tíma".

Við erum ekki svo vel sett að geta ferðast með hraðlestum milli landshluta, enda landið strjálbýlt í flestum samanburði a.m.k. utan Faxaflóa.

Þess utan er það nú svo að rafknúnar flugvélar eru rétt handan við hornið, samkvæmt því sem fram kom í útvarpsviðtali við samgönguráðherra fyrir u.þ.b. ári síðan, eða tveimur.

Ekkert hefur spurst af því tækniundri síðan svo við höfum tekið eftir, en við bíðum og hlökkum til.

Miklar framfarir eru samkvæmt þessu framundan í flugmálum og gott til þess að vita að við skulum búa svo vel, að vera ekki háð jarðefnaeldsneyti til framtíðar.

Hvort rafrellurnar muni draga á eftir sér kapalinn, eða orkan verði send eftir brautum astralplansins er ekki vitað, því allt er þetta á huldu, en við bíðum spennt og hlökkum til framtíðarinnar.

Landsvirkjun  mun væntanlega þurfa að virkja sem aldrei fyrr, Vinstri grænum umhverfisberserkjum til hremmingar!

Svo getur náttúrulega verið að lausnin muni felast í því að flugvélar framtíðarinnar komi til með að draga á eftir sér vindorkuver - vindmyllur - sem muni framleiða rafmagnið jafnharðan. Eða að eftir vélunum endilöngum verði vindgöng sem virkjuð verði í sama tilgangi og styttist þá í eilífðarvélina og gott ef ekki meira en það!

Góðar útgáfur af flugvélum framtíðarinnar má finna í alnetinu.

Þar er svo dæmi sé tekið ein, sem er eins og sérsmíðuð fyrir fyrir Vinstri græn, hugguleg rella með rafhlöðuna í nefinu og farþegana á sínum stað græna og sællega í vistvænleikanum.

 

 

Aðra má finna sem er sem sérsniðin fyrir Sjálfstæðismenn í hópeflisferðum; straumlínulöguð og mikil um sig og til í flest. Enginn efi er að fundarhöld í háloftunum munu efla mönnum andagift og hugarþrótt. Þar verður hægt að brugga launráð og vélráð og koma á ráðahag, auk þess sem þjóðarhagur verður hafður með, gerum við ráð fyrir. Nema NATO verði falið að sjá um svoleiðis leiðinda vesen.

Ein er sem sérsniðin fyrir Framsóknarmenn. Belgmikil og jafnbola auk þess að vera þríbola. Þar verður pláss fyrir allar skoðanir, eða a.m.k. þrjár. Einnig getur komið til greina að einn bolurinn verði notaður til skoðanaskipta; verði skoðanaskipta-skiptistöð, plássmikil og rúm. Eins og kunnugt er, þá þurfa Framsóknarmenn oft að skipta um skoðun eftir því hvernig vindarnir blása. Þarna verður gott við það að eiga, hátt til lofts og vítt til veggja og allt saman vel afrúnnað og tiltölulega þægilegt til að renna sér um í stefnu-leitum og hugljómunar-smalamennskum.

Og allt rafknúið, að sjálfsögðu.