Allt í plati?

Þá er komið í ljós hvers vegna svo er komið, sem komið er í hagstjórninni; starfslið Seðlabankans er ekki með það á hreinu til hvers það sé í vinnunni. Sú saga hefur gengið til margra ára að vinna í stofnuninni fari þannig fram að menn mæti á morgnana með jakka í poka sem sé til þess ætlaður að hengja á skrifborðsstólinn og þá líti svo út að viðkomandi sé í vinnunni, en hafi brugðið sér frá, sé á fundi eða hafi brugðið sér á salernið. Hvort þessi saga er sönn verður ekki lagt mat á hér, en framkoma starfsmanna bankans í þessu máli gefur henni byr og eykur ekki traust þjóðarinnar á honum, sem víst er ekki of mikið fyrir.

Er það kannski ástæðan fyrir hvernig til tókst í tíð Davíðs Oddssonar, að hann hafi búið við það að hafa sér til fulltingis alls óhæft starfslið og ef það er rétt, hversu ómakalegt er þá að hann sitji nánast einn uppi með skömmina yfir hvernig til tókst með stjórn peningamála. Ástæða er til að hugleiða hvort ekki þurfi að taka meira til í stofnuninni, þó ekki væri nema vegna þess að svo virðist sem starfslið hennar sé í meiriháttar vanda með að reikna út skuldir þjóðarbúsins. Hinar og þessar tölur eru á sveimi en enginn botn virðist fáanlegur í hverjar eru réttar. Rétt er líka að minnast þess að svo var að sjá sem starfslið bankans væri drifið áfram af óskhyggju í aðdraganda hrunsins, taldi til að mynda að í farvatninu væri ofurlán frá Rússum og ekki nóg með það nægur gjaldeyrir væri til, til næstu níu mánaða. Hvað þá tæki við virtist vera eitthvað sem ekki þyrfti að hugsa um, líkt og þetta allt saman væri bara ómerkilegur tölvuleikur og hægt væri að ýta á ,geim over' takkann þegar við yrðum leið á leiknum. 

Vegna orða Ragnheiðar Elínar og fleiri þingmanna, einkum úr Sjálfstæðisflokknum finnst bloggara rétt að benda á að Davíð Oddsson er ekki guðleg vera (nema þá í huga nokkurra Sjálfstæðismanna), hann er ekki heldur í tengslum við þann í neðra, ef einhverjum skyldi nú hafa dottið það í hug. Eftir því sem best er vitað er hann bara venjulegur maður, kannski óvenjulega litrík persóna og oft á tíðum skemmtileg og því er með öllu óþarft að stökkva upp á nef sér í hvert skipti sem nafn hans er nefnt, hvort sem er í jákvæðu eða neikvæðu samhengi.

 

Ekki formleg umsögn Seðlabanka