Hið ískalda mat

Ískalt mat framsóknarmanna á Icesave samningnum er að ekki skuli greiða honum atkvæði á þingi.

 Það var á sínum tíma einnig ískalt mat þeirra að skipta skyldi upp Búnaðarbanka og Landsbanka á milli vildar og einkavina Sjálfstæðis- og  Framsóknarflokksins. Afleiðingar þess gjörnings hafa verið að koma í ljós á undanförnum mánuðum og þó ekki væri nú nema vegna þess, þá hefði verið hægt að láta sér detta í hug að þeir fyndu til sektar og að minnsta kosti teldu sig hafa gert mistök, er bankarnir voru einkavinavæddir.

Nei, það er öðru nær, þau finna ekki fyrir því og þeir sem fylgdust með þættinum ,,Í vikulokin", á Rás 1 í gærmorgun fengu sýnishorn af framsóknarendurnýjuninni, er þeir hlustuðu á hina nýju þingkonu þeirra. Þar tjáði sig sú sem er fulltrúi á þingi fyrir flokk, sem stóra ábyrgð ber á því sem hefur verið að hellast yfir þjóðina að undanförnu, en ekki var á henni að heyra að þau þyrftu að líta yfir farinn veg, áður en öslað yrði fram með fullyrðingavaðal og útúrsnúninga. 

Framsóknarfólkið heldur sig við 20% delluna og nú bætist það við, að á miðstjórnarfundinum var skorað á þingmenn flokksins að vera ekki að þeirri ósvinnu að hugsa sjálfstætt. Ekki að það sé eitthvað nýtt, sagan greinir svo frá, að þingmönnum Framsóknarflokksins hafi verið einkar lagið að hugsa (sumir myndu segja ekkert, en það er auðvitað ofsagt) ekki sjálfstætt. Hægt væri að tína til mörg dæmi um það, en nægið að nefna Íraksmálið í því sambandi, auk þess sem gera verður ráð fyrir að einhverjum þingmanninum hafi þótt ástæða til að gera athugasemdir við einkavæðinguna og sundrun Rarik á sínum tíma, svo dæmi séu tekin.

Hinn roðfasti formaður flokksins virðist hafa bitið það í sig að ekki skuli gengið til samninga við Breta og holllendinga varðandi Icesave málið og vill frekar halda uppi ósætti við þær þjóðir. Hann talar jafnvel á þann veg, að öðrum en honum sé það eitthvert kappsmál að leggja sem mestar byrðar á íslensku þjóðina út af því klúðri öllu saman.

Honum sést yfir að það var íslenskt fyrirtæki sem rak Icesave og tók við peningum fólks til ávöxtunar. Það var einnig stólað á að íslenskir eftirlitsaðilar fylgdust með starfseminni og það var einmitt það eftirlit sem brást. Því situr fólk eftir með sárt ennið, bæði erlent og ekki síður íslenskt, eftir að hafa treyst íslenskum eftirlitsaðilum. Aðilum sem fram á síðasta dag gáfu bönkunum heilbrigðisvottorð og brugðust þannig algjörlega því hlutverki sem þeir áttu að uppfylla.

En íslensk stjórnvöld sjá um sína, þau lögðu til hundruð milljarða til að fjármagnseigendur fengju sitt af okurreikningum bankanna, það var ekki litið svo á að það fólk hefði tekið áhættu. Nei, þeir einir tóku áhættu, að mati íslenskra stjórnvalda, sem keypt höfðu hlutafé í fyrirtækjunum landsins og ekki síst bankanna.

,,Vont er þeirra réttlæti, en verra er þeirra ranglæti", sannast hér sem svo oft áður. 

Miðstjórn Framsóknar: Þingmenn styðji ekki Icesave samninginn

Athugasemdir

[Axel Jóhann Hallgrímsson, 14.6.2009 kl. 12:35]

Ég held að Framsóknarflokkurinn hafi aldrei frá stofnun hans 1916, verið jafn rislítill og aumkunarverður og nú um stundir. Þeir andskotast í þeim sem hafa fengið það lítt öfundsverða hlutverk að moka yfirfullan flórinn í samyrkjufjósi Framsóknar og Íhalds. Þeim væri hollt að íhuga hvaðan og hvernig öll þessi mykja sé tilkomin. Þeir ættu að sjá sóma sinn í því að þvælast ekki fyrir vinnandi fólki hafi þeir sjálfir ekki áhuga á að taka til hendi.