Svarthol

Íslenskt hagkerfi er svarthol og hefur verið svo lengi sem elstu menn muna. Nú eru uppi hugmyndir um að flytja fé lífeyrissjóðakerfisins inn í þetta svarthol í auknum mæli og verður það að teljast fremur vafasamt. Engin samstaða er um að byggja upp íslenskt hagkerfi, ekki úr rústum, ekki endurreisa, því það er ekki hægt að endurreisa það sem aldrei hefur verið uppistandandi.

Það að ætla að flytja fjármuni lífeyriskerfisins að öllu(?) leiti inn í íslenskt hagkerfi - ef hagkerfi skyldi kalla - er í raun ekki neitt annað en upptaka á þeim sparnaði sem launafólk hefur nurlað saman undanfarin ár. Við verðum að fara að horfast í augu við það að í sukkhringiðu eins og þeirri sem hér hefur verið og kölluð hagkerfi, getur enginn venjulegur og heilbrigður atvinnurekstur starfað. Dæmi um atvinnustarfsemi sem getur hugsanlega lifað í fjármálaumhverfi af íslensku gerðinni er ef til vill rekstur spilavíta og hóruhúsa og annað af því tagi.

Þau sem harðast berjast gegn ESB hafa horft, mörg hver, til þess að gera tvíhliða viðskiptasamninga við Kína, svo efnilegt sem það er að ætla íslenskri alþýðu að keppa við kúgað verkafólk í Kína. Fróðlegt verður að fylgjast með hvernig þetta fólk vinnur sig út úr uppákomunni sem varð vegna komu Dalai Lama á dögunum. Umburðarlyndi og elskulegheit kínverskra ráðamanna hljóta eftir þá heimsókn að vera orðin m.a.s. hörðustu andstæðingum ESB ljós. Vonandi skoða þau hug sinn í framhaldinu.  

Landsvirkjun fái fé frá lífeyrissjóðum

Athugasemdir

[Ína (IP-tala skráð) 5.6.2009 kl. 11:43]

Þarf ekki að fara að gjörbreyta þessu lífeyrissjóðskerfi öllu saman? Ef ég mætti ráða þá vildi ég kaupa ríkisskuldabréf fyrir þá peninga sem ég borga í lífeyrissjóð í hverjum mánuði. Það er furðulegt að borga peninga í þetta kerfi en ráða engu um hvað er gert við þá. Það á að færa þessa sjóði til fólksins og leyfa fólki að ráða sjálft hvernig það ávaxtar þessa peninga.Þarna sitja einhverjir karlar á ofurlaunum sem haga sér eins og kóngar. Kominn tími til að breyta þessu kerfi.

[Jón Bragi Sigurdsson (IP-tala skráð) 6.6.2009 kl. 22:44]

Er alveg innilega sammála ykkur.

Og í þetta á að henda lífeyrissjóðunum. Mér verður óglatt af því að sjá og heyra stjórnendur sjóðanna diskútera og gera sig breiða yfir því hvað þeir ætla að gera við peningana okkar.

Af hverju er ekki sótt um lán/fjármögnun hjá einhverjum bönkum eða fjárfestum á Íslandi eða erlendis? Getur það verið vegna þess að einginn með viti sér nokkra glóru eða ágóða í þessum framkvæmdum?

Og af hverju þá lífeyrissjóðina? Jú af því að þar þarf ekki einu sinni að spyrja eigendurna leyfis þegar peningarnir þeirra eru teknir í eitthvað vafasamt. Það er bara að koma eftir einhver ár og segja; æ sorry þetta fór víst á verri veginn og peningarnir ykkar eru orðnir að eingu. No hard feelings!

Fuss og svei!