Friður eða vopnahlé

Newsweek greinir frá því að tekist hafi að koma á vopnahléi, í átökunum milli Íran og Ísraels.

Við getum vonandi leyft okkur að vona að um sé að ræða vopnahlé sem heldur en í niðurlagi umfjöllunar Newsweek er eftirfarandi fyrirvari settur:

Þar sem engin opinber staðfesting hefur komið fram um samkomulagið frá Íran eða Ísrael og möguleiki er fyrir átök, er friður langt frá því að vera tryggður.

Það er sem sagt ekki ástæða til að rjúka upp til handa og fóta til að fagna en svo er að sjá, sem a.m.k. einhver von sé að menn haldi aftur af sér.

Auðvitað vonum við öll að það muni ríkja friður vítt um veröld alla, því eins og sjá má á myndinni, sem fylgir frétt Newsweek, er fátt andstyggilegra en þegar átök brjótast út milli landa og þjóða.

Myndin sýnir reyk stíga upp frá því sem munu vera höfuðstöðvar íslamska byltingarvarðarins í Sarallah norður af Teheran í Íran, eftir að á þær var skotið þann 23/6.

Vonir um að Trump myndi reynast fær um að koma á friði milli Rússa og Úkraína hafa ekki ræst enn sem komið er og fátt sem bendir til að friður þar á milli sé í sjónmáli.

Við lifum í voninni um að stjórnmálamenn heimsins reynist færir um að ræða sig til niðurstöðu um deilumál í stað þess að beita vopnavaldi.

Séu þeir ekki færir um það, geta þeir alltaf tekið íslensku leiðina, malað úr ræðustól þar til enginn nennir lengur að hlusta, ekki flokkssystkini þeirra heldur!

Hvernig væri að senda framkvæmdastjóra hinna Sameinuðu þjóða til Íslands og bjóða honum á íslenska þingpalla til að hlusta á malið?