Ingimundur Bergmann

22.2.2023 | 11:49

Borð fyrir báru

Ritari man eftir því að hafa séð skrif eftir Björn Bjarnason þar sem hann bendir á að ekki sé gott, að birgðir af eldsneyti séu ekki til í landinu, nema til nokkurra daga og ef rétt er munað voru dagarnir um 10.

Nú sjáum við sem lesum Morgunblaðið, að rætt er um að lengja svigrúmið í um þrjá mánuði, sem varla getur talist of mikið. Samt er það svo að samkvæmt því sem segir hér til hliðar, þá hleypur kostnaður af slíku birgðahaldi á hundruðum milljóna.

Það er dýrt að lifa og það er líka dýrt að vera fátækur, er sagt og hér kemur það fram og gera má ráð fyrir að kostnaðurinn af birgðahaldinu kæmi fram í vöruverðinu.

En er það ekki þess virði?

Það er aumt fyrir eyþjóð að verða uppiskroppa með eldsneyti og ef rétt er, að birgðir séu að jafnaði ekki til nema 10 daga, þá er ekki mikið uppá að hlaupa ef truflun verður á aðdráttum; seinkun á olíuskipi eða skipum af einhverjum ástæðum.

Ritari man eftir að þegar hann starfaði á olíuskipi sem var notað til að dreifa olíu um landið frá Hvalfirði og Örfisey, að þá var mikið að gera og ekki mátti mikið út af bera.

Skipin sem í þessu voru, voru þrjú þ.e.: Litlafell, Stapafell og Kyndill.

Þann tíma sem ég var við þetta var aldrei nokkurt stopp á þessum flutningum og við á Litlafelli vorum á þessum tíma að flytja flugvélaeldsneyti og bifreiða og fyrir flugið, var það sótt í birgðatanka í Hvalfirði.

Nú er svo að skilja sem birgðahald hafi verið lagt af í Hvalfirði og hugsanlega er búið að rífa tankana sem þar voru, enda væru þeir komnir vel til ára sinna ef svo væri ekki!

Væri ekki gott ráð að taka til skoðunar varnaðarorð Björns Bjarnasonar um þessi mál og koma því svo fyrir að eldsneytisbirgðir séu að lágmarki til þriggja mánaða?

Það eru óvissutímar í heimsmálunum núna og enginn veit til hvers það mun leiða, aðfangakeðjur geta rofnað eða truflast og þá er gott að hafa borð fyrir báru.

Flokkur: Stjórnmál og samfélag | Facebook