Það sem látið er dankast og Jörðin sem snýst

Oddný Harðardóttir þingmaður Samfylkingarinnar skrifar um heilbrigðismálin í Fréttablaðið í dag (31.1.2023).

Þar sjáum við það, að heilbrigðiskerfið er ekki fyrir þá sem ekki geta borgað fyrir sérfræðiþjónustu.

Oddný minnir á að heilbrigðiskerfið er tvískipt, þ.e. annars vegar rekið af hinu opinbera og hins vegar einkarekið.

Samningar við sérfræðilækna hafa verið lausir í fjögur ár og vegna þessa samningsleysis hafa verið innheimt sérstök komugjöld af þeim sem þurfa að nota sér þjónustu sérfræðilæknanna.

Oddný minnir á að efnahagur fólks er misjafn og að gjöldin koma harðast niður á þeim sem minna hafa og að ekkert í lögum um sjúkratryggingar tryggir sjúklinga gegn slíkum aukakostnaði.

Hún greinir frá því að hún verði fyrsti flutningsmaður á frumvarpi sem ætlað er að tryggja að greiðsluþátttöku sjúklinga verði haldið í lágmarki og sem muni taka á því ef samningar við sérfræðilækna takist ekki innan tiltekins tíma.

---

Í sama blaði er sagt frá öðru og alls óskyldu máli, þ.e.a.s. því að hluti Jarðarinnar okkar sé farinn a snúast öfugt og þó það komi ekki fram í greininni, þá hvarflar það að bloggara, að hér sé fundin skýringin á því hve einkennilega ýmsir ráðamenn heimsbyggðarinnar eru farnir að hugsa í seinni tíð.

Ekki er með öllu útilokað að þegar svona atburðir gerast með hnöttinn sem við öll lifum á, að þá geti rökhugsun brenglast og útkoma þankagangsins verði eftir því.

Það munu vera kínverskir vísindamenn sem uppgötvuðu viðburðinn, sem mun eiga sér stað í innsta kjarna Jarðarinnar.

Við skulum vona að ráðamenn heimsins átti sig á þessu og þó menn hefi ekki verið í færum til að greina svona atburði innst inn í Jörðinni okkar á dögum heimstyrjaldanna, þá er aldrei að vita nema þarna hafi hundurinn legið grafinn.

Djúpt inn í miðju Jarðar!

Hitler og allt hans hyski getur hafa verið undir áhrifum að segulsviðsbrenglun og hafi svo verið, þá hefur því liði ekki verið sjálfrátt

Það skyldi nú aldrei vera að fundin sé skýringin á því sem er að gerast í dag og að gott gæti verið að gefa mönnum meira járn í kroppinn?