Höggva fyrst og spyrja svo.

Þingmaður kvað uppúr með það á Facebook fyrir nokkrum dögum að hann vildi láta lóga öllum minkum á minkabúum á Íslandi.

Jafnaði hann því við það að skera niður kindur vegna riðuveiki, en á þeim tíma sem þingmaðurinn fylltist niðurskurðaráhuganum var ekki vitað til að minkarnir væru smitaðir af veirupestinni sem herjar á samfélagið, og svo er enn þegar þetta er ritað.

Kindur eru ekki skornar niður vegna riðuveiki nema fyrir því liggi sönnun, að greinst hafi í stofninum riða. Þingmaðurinn lagði málið fyrir sem um endanlegan niðurskurð yrði að ræða og að minkaeldi til skinnaframleiðslu yrði þar með hætt. Fékk hann góðar undirtektir frá fólki (sumum) í athugasemdum við færslu sína. Fólki sem virtist vera þeirrar skoðunar að það væri siðlaust að ala minka til að nýta af þeim skinnið og það er sjónarmið, en kemur ekki við því sem var tilefni til þess sem sagði í færslu þingmannsins: að hugsanlegt væri (en ósannað) að minkarnir bæru með sér veirusmit.

Þegar kindur eru skornar niður vegna riðu eru bæturnar sem greiddar eru úr ríkissjóði, ætlaðar til að bæta og brúa bilið þar til búskapur hefst að nýju. Aðrar búgreinar en sauðfjárrækt, njóta ekki þeirra trygginga samfélagsins að tjón sé bætt úr ríkissjóði.

Þegar svokallað ,,búvörugjald" var dæmt ólöglegt hættu greiðslur að berast í ,,Bjargráðasjóð" og af því leiddi að ekki er lengur á að treysta að bændur, sem verða fyrir alvarlegum áföllum, geti sótt þangað bætur vegna tjóna sem þeir verða fyrir.

Það er miður og engan vegin gott, að staðan sé þannig, að bændur eigi það undir afstöðu sitjandi landbúnaðarráðherra hvort áföll sem þeir verða fyrir fáist bætt. Eðlilegra væri að bætur væri hægt að sækja í tryggingasjóð sem væri þannig fjármagnaður, að greitt væri til hans tillegg af framleiðslu, líkt og  gert var áður fyrr, þ.e. þegar fyrrnefnt gjald var innheimt í Bjargráðasjóð.

Rannsóknir höfðu ekki farið fram á íslenskum minkabúum þegar þingmaðurinn sem fyrr var nefndur, fékk hugmyndina sem hann varpaði fram á Facebook og jafnaði hann fyrrnefndum niðurskurði minka við það þegar kindur eru skornar niður vegna riðu og taldi riðubætur geta verið nægar til að bæta slíkan gjörning, en talaði fyrir verknaðinum, sem um endanlega stöðvun framleiðslunnar yrði að ræða.

Bætur sem greiddar eru vegna riðuniðurskurðar eru ekki hugsaðar þannig, þó viðkomandi bóndi geti vissulega valið að hætta búrekstri.

Matvælastofnun er að hefja könnun á hvort íslenskir minkar séu smitaðir af kórónuveirunni sem skekur samfélagið okkar.

Í meðfylgjandi frétt Morgunblaðsins sagði frá því að til stæði að skima fyrir kórónuveirusmiti á minkabúum landsins. Matvælastofnun ætlar að vinna faglega í málinu, rannsaka það og greina síðan frá niðurstöðunni.

Þingmaðurinn þurfti ekki á slíkri rannsókn að halda. Hann vissi bara hvað honum fannst.