Hátæknivæðing í landbúnaði.

Í Bændablaðinu les maður ýmsan fróðleik og fréttir. Blaðið sem barst á dögunum er engin undantekning frá því og í því blaði, er sagt frá því að tekið hafi verið í notkun ,,hátæknivætt" fjós með hundruðum kúa.

Það hefur verið grunnt á því að tæknivæðing húsakynna fyrir húsdýrin sé litin hornauga og jafnvel reynt að læða því inn að um vonda þróun sé að ræða og hefur orðið ,,verksmiðjubúskapur" þótt viðeigandi af þeim sem sjá landbúnaðarrómantíkina felast í stritandi og skítugum mönnum sem hokra í sveita síns andlitis.

Nú eru upp komnir nýir tímar, með fjósum sem eru með vélbúnaði til að fóðra kýrnar, loftræsta fjósin og varðveita afurðirnar sem eru mjólkaðar af vélmennum, þegar kúnum hentar og þörfin kallar. Fyrir utan það að önnur verðmæt afurð, skíturinn og hlandið er varðveitt til nota á tún og akra og ef til vill í náinni framtíð til orkuvinnslu.

Það er ástæða til að gleðjast yfir þessum framförum og vonandi að allt gangi vel fyrir þeim sem að standa.

Það er líka ástæða til að gleðjast yfir hinu nýja og jákvæða orði sem nú er haft yfir það þegar tæknin er tekin til nota við allt frá loftræstingu til útdælingar á úrgangi og allt þar á milli. 

Menn geta þá sett í glatkistuna það niðrandi orð sem þeir töldu sig vera að nota þegar alifugla og svínabændur innleiddu tæknivædda búskaparhætti, búfénaðinum og búaliði til hagsbóta.