Prósentan og tjáningarfrelsið

Forsætisráðherra mætti í viðtal í þættinum Kastljós í sjónvarpi Ríkisútvarpsins og lýsti afstöðu sinni til málþófsins, sem stjórnarandstaðan hefur haldið uppi í umræðum á Alþingi síðustu vikur.

Gera má ráð fyrir að öll helstu sjónarmið séu löngu komin fram í veiðigjaldamálinu sem verið hefur til umræðu.

Svo er að skilja sem stjórnarandstaðan sé að reyna að halda því fram, að gjald það sem um ræðir, sé sem meitlað í stein og að þegar það var ákveðið á sínum tíma, hafi hin eina sanna prósenta hvað veiðigjöldin varðar verið fundin út, ákveðin og lögsett.

Menn hafi dottið niður á hina einu sönnu prósentu!

Vitanlega er það ekki þannig og málið snýst trúlega um, að hinir málglöðu vilji ekki slá á höndina sem nærir, eða vilji að minnsta kosti sýna fram á, að þeir hafi staðið í stykki sínu sem ,,varðmenn“ um prósentuna ,,heilögu“.

Það er illa komið fyrir Alþingi þegar mál er tekin í gíslingu með þessum hætti og gildir þá einu hverjir það gera.

Við erum svo lánsöm að búa við lýðræði en ekki málræði.

Sagan sýnir að fólk hefur mótmælt af miklum krafti því sem ekki hefur fallið í kramið hjá þeim sem mótmælt hafa og má í því sambandi benda á mótmælin á Austurvelli 1949.

Þau skiluðu ekki öðru en því, að fólk gat komið á framfæri skoðunum sínum varðandi varnarsamninginn við Bandaríkin.

Mótmælendur komu sinni skoðun á framfæri og endurtóku það síðan hvað eftir annað m.a. með hressandi(?) göngutúrum frá Keflavík til Reykjavíkur.

Þannig er það og þannig mun það verða, að við höfum ýmsar skoðanir á því sem um er að ræða í lýðræðisríkinu okkar, en við skulum ekki gleyma því að lýðræðið er viðkvæmt og það þarf að fara vel með það.

Því er löngu komið að því, að hinir málglöðu tíni saman plögg sín, hvíli raddböndin og fara að hugsa málið upp á nýtt.

Vilji þeir hins vegar halda málflutningi sínum áfram, þá geta þeir það, en ættu að velja sér til þess annan vettvang en þann sem þeir hafa verið á undanfarnar vikur.

,,Mér finnst rigningin góð“ var eitt sinn sungið og þingmennirnir hugumstóru gætu kælt sig niður í henni til að byrja með og farið síðan í heitt bað.

Að búa í lýðræðisríki þar sem ríkir tjáningarfrelsi eru forréttindi sem ekki ætti að misnota.