Fullur af hverju?

Þau sem fylgdust með umræðunum á þingi, er umrædd ræða Sigmundar Ernis var flutt, urðu vitni að æði mörgum uppákomum sem tæpast geta verið þingmönnum sæmandi. Undirritaður horfði á bæði ræðu Árna Johnsen og Sigmundar ásamt fleirum, en það eru þær sem sitja eftir, en af ólíkum ástæðum þó.

Ræða Árna vegna vafasams orðbragðs og þess hve forseti þurfti oft að áminna hann um að gæta sín, en ræða Sigmundar vegna þess hve mikil og góð eldmessa (svo notuð sé lýsing Ragnheiðar á henni) hún var. Um var að ræða skrifaða ræðu sem flutt var með tilþrifum og skírum áherslum þar sem farið var yfir hvernig þjóðin lenti í Icesave- ósköpunum; óvenju kröftug og mögnuð greining á stöðunni. Sigmundur mátti hafa sig allan við til að geta flutt ræðuna svo mikið fór hún fyrir brjóstið á ýmsum þeim þinglufsum og fundarfíflum sem stöðugt gjömmuðu frammí fyrir ræðumanni. Greinilegt var að þau sem á heyrðu voru í vandræðum með sig, leið illa og kveinkuðu sér vegna útreiðarinnar sem þau fengu.

Að ræðu lokinni virtist ræðumaður taka þann pól í hæðina að svara andmælum eftir því sem tilefni þeirra gaf til, þ.e. flestum út í hött, samkvæmt reglunni um að heimskuleg spurning framkalli heimskulegt svar. Var það miður, því víst er að það hefði einungis gefið ræðunni meira vægi ef svörin hefðu verið yfirveguð og kurteisleg og þar með í algjörri andstæðu við frasakennda framkomu fyrirspyrjenda og frammíkallara.

Í framhaldi af þessu hefur þeirri sögu verið komið á kreik að Sigmundur hafi verið undir áhrifum áfengis er ræðan var flutt. Um sannleiksgildi þess veit ég náttúrulega ekki neitt, af ræðuflutningnum verður það ekki ráðið, en hins vegar má segja að er kom að andsvörum, hafi hann ekki virst vera í jafnægi, en það sama má segja um þau sem tóku þátt í umræðunni, bæði þau Vigdísi sem lét óvenju vargalega í ræðustóli og eru menn þó ýmsu vanir frá henni, sló um sig og barði púltið með blaðabunkanum og Höskuld sem var með dónaleg brigslyrði í frammíköllum og sleppti orðum úr setningum.

Aumt er ef menn þurfa að vera kenndir til að flytja góðar og grípandi ræður á þingi og vonandi að svo hafi ekki verið, en fremur auðvelt hlýtur að vera að upplýsa málið svo léttvægt sem það er því:

Ræðan var góð og með þeim bestu sem fluttar hafa verið í langan tíma en andmælin ekkert annað en sparðatíningur og skætingur sem varla var svaraverður og hefði Sigmundur átt að taka sér til fyrirmyndar Davíð Oddson er hann ákvað að svara ekki andmælum er honum var ofboðið. Vonandi var Sigmundur bara fullur af eldmóði. Davíð var bara fullur af gleði eins og kunnugt er.

Ragnheiður: Ekki þinginu sæmandi

Athugasemdir

[Sigurður Þór Guðjónsson, 26.8.2009 kl. 12:15]

Það er ekki léttvægt EF satt reynist að alþingismaður sé drukkinn í ræðustól á alþingi. Það er alvarlegt mál.

[so (IP-tala skráð) 26.8.2009 kl. 12:38]

Það er grafalvarlegt mál ef þingmaður hefur verið drukkinn í ræðustól á Alþingi.  Er ekki sammála að allir hafi verið með sparðatíning nema SER.  Þingmenn voru að reyna að draga svör út úr þingmanninum og hann lét eins og fifl!

[Marilyn, 26.8.2009 kl. 12:38]

Finnst léttvægara ef hann hefur verið við lögleg mörk til að keyra, það er ekki eins og hann sé flugstjóri - Alvarlegra finnst mér agaleysi stjórnarandstöðunnar að gjamma í sífellu fram í og tel að sögur af drykkju séu spuni til að beina athyglinni frá því. Fyndið í ljósi þess að nú horfa allir á ræðuna og flestum virðist vel líka!

[Sigurður Helgason (IP-tala skráð) 26.8.2009 kl. 12:45]

Hvað er alvarlegt við það að vera fullur í ræðustól alþingis ?????????

Ekki er það svo merkilegur stóll,,,,,,,EÐA ÞEIR MENN SEM UPP Í HANN FARA,,,,,,

Ég segi það satt að betra er að vera fullur og segja satt en ó fullur og ljúga, þetta var góð ræða hjá Sigmundi og hann hefði mátt öskra meira á þessa,HÁLVITA SEM SÁTU FYRIR FRAMAN HANN,

Hann talaði mannamál og sagði sanleikan,hann má gera meira af þessu þá kanski færi ég mig úr mínum flokki og yfir til hans

[Jón (IP-tala skráð) 26.8.2009 kl. 12:48]

Ef hlustað er á ræðuna sem hann flutti rétt á undan er það dagljóst að þingmaðurinn er alls ekki drukkinn heldur þvert á móti í miklum og allsgáðum eldmóð. Ég held að hann hafir bara verið svo úrvinda eftir þann tilfinningaþunga sem hann lagði í ræðuna að hann missti sig soldið í þrasinu á eftir. Allt tal um ölvun er algert þras og tittlingaskítur sem kemur ekkert málinu við, fyrir utan að vera alrangt. Sumir þingmenn vilja helst verja tíma sínum og orku í tittlingaskít sem kemur málefnunum nákvæmlega EKKERT við.

[Ingimundur Bergmann, 26.8.2009 kl. 12:52]

Sigurður. Ef til vill er það skýringin á framkomu vissra þingmanna (frammíköll o.fl.) að þeir séu kenndir

Marilyn. Já, enda var ræðan góð!

[Þórbergur Torfason, 26.8.2009 kl. 13:01]

Sæll Ingimundur minn. Ég sá ekki Sigmund flytja sína ræðu sem líklega hefur verið skrifuð en ljóst er að maðurinn var sauðdrukkinn í andsvörunum sem ekki voruð skrifuð. Það vantaði ekkert nema að hann hikstaði og frussaði veigunum frá MP banka yfir forseta sem hafði ótrúlega mikla þolinmæði. Mér er til efs að einhver framsóknarlufsan hefði fengið að standa þarna og styðja sig og öskra yfir þingheim án þess að fá glymjandi forsetabjölluna í hnakkann.

Nei Ingimundur minn. Við getum leyft okkur að vera fullir úti í náttúrunni en ekki í vinnunni. Fyrir þessu framferði er nákvæmlega engin afsökun

[Sigurður Helgason (IP-tala skráð) 26.8.2009 kl. 13:07]

Ég held að það sé heimska og að þeir telji okkur heimskari en við erum :)

Ég er alla vegana búinn að fá mig fullsaddan á þeim,

[Sigurður Helgason (IP-tala skráð) 26.8.2009 kl. 13:51]

Þórbergur,,,,,,,,þú sást hann ekki flytja ræðuna, en telur ljóst að hann sé sauð drukkin, þú ættir að skammast þín ,,,,bermúta skál,,,,,,

Við sjálfstæðismenn eigum að fara á hnén og biðja þjóðina afsökunar á mistökum okkar, en ekki að vera með svona gorgeir, og hóran sem hefur fylgt okkur gegnum tíðina á að gera það líka,

þeir sem kusu XD og XB skulda þjóðinni afsökunarbeyðni,hrunið er okkar sök,það erum við sem mættum fullir á kjörstað og greiddum atkvæði........

SIGMUNDUR sagði sanleikan fullur eða ófullur,ef menn þurfa vera fullir í ræðustólnum til að segja sanleikan,,,,,,

OPNUM BAR Á ALÞINGI

[Ingimundur Bergmann, 26.8.2009 kl. 17:17]

Þá er Sigmundur búinn að senda frá sér yfirlýsingu og málið er upplýst hvað hann varðar, en þá er eftir að fá skýringu á hvað gekk að frammí- köllurunum. Voru þeir líka búnir að vera í matarboði hjá MP- banka?

Hvernig má það vera að þjóðinni er boðið uppá það að þingheimur hagi sér eins og óstýrilátur bekkur í unglingaskóla, ekki bara í þetta skipti, heldur alltaf og ævinlega?

[Þórbergur Torfason, 26.8.2009 kl. 19:52]

Sigurður ég sá andsvörin á youtube og geri ekki ráð fyrir að það sé feikað. Maðurinn var drukkinn og hafði ekki stjórn á mæli sínu né skapi um það þarf ekki að deila.

Auðvitað skuldið þið X-D og X-B stuðningsmenn okkur hinum mikið, jafnvel meira en þið getið nokkurntíman staðið í skilum með. Þess vegna vorkennum við Ingimundur ykkur að vissu marki og vonum og biðjum að þið látið ekki glepjast að fjórum árum liðnum og kjósið ekki yfir okkur fyllihrúta og spilafíkla.

Styðjum V-G til sigurs.

[Ingimundur Bergmann, 26.8.2009 kl. 21:06]

Þórbergur, ekki er víst að það dugi að vona og biðja- því: Þá kemur bláa höndin til skjalanna! 

[Þórbergur Torfason, 26.8.2009 kl. 22:09]

Jú rétt Ingimundur en verðum við ekki samt að vona og biðja að "bláa höndin" sú eina sanna sé lögst í dvala til framtíðar. Annað mál verður með framsókn sem sífellt kemur á óvart. Hún er mesta ólíkindatól mannkynssögunnar. Það er ekki nokkur leið að átta sig á bullinu sem þaðan rennur.

[Predikarinn - Cacoethes scribendi , 26.8.2009 kl. 22:54]

SER varð sjálfum sér, þingi og þjóð til skammar. 

Það eru tvær gerðir af myndbandi í gangi. Annars vegar er um að ræða stytta útgáfu með skýringum í römmum til að glöggva áhorfendur um það sem er að gerast eins og t.d. hvaða spurning það er sem SER er a reyna að svara. Það er ekki hægt með nokkurri sanngirni að segja að það styttra sýni SER eitthvað í verra ljósi en hið óstytta. Það hljómar kannski ágætlega að nota þá átyllu fyrir þau ykkar sem vilja bera blak af SER.

Hvernig viljið þið t.d. skýra af ykkur beinar lygar SER þegar hann sagði fréttamönnum í einhver skipti að hann hefði ekki snert áfenga drykki þennan dag ? Þá er DV með heimildarmenn innan úr matarboðinu sem hann var í sem segja SER hafa hellt í sig.

Undirritaður hefur oft séð SER bæði drukkinn sem ódrukkinn um tíðina. Miðað við myndböndin bæði, þá hallast skrifari að því að SER hafi verið meira en miðlungs hífaðan. Þetta fæst víst aldrei sannað þar sem ekki er blásið í áfengismæli né tekin blóðprufa á ALþingi þegar svona kemur upp.

SER varð sjálfum sér, þingi og þjóð til skammar. 

[Ingimundur Bergmann, 27.8.2009 kl. 20:16]

Já Þórbergur, miðað við móttökurnar sem Hannes á horninu fékk í dag, þá er hún búin að vera, en framsókn ekki veit ég á hvaða eyðimerkurgöngu þau eru!