Framsóknarfrjálslyndi.

Ég sé á Fasbókinni að Framsóknarmenn eru að deila hver við annan um hvort flokkurinn þeirra sé frjálslyndur eða ekki.

Fyrir u.þ.b. 45 árum átti að gera mig að Framsóknarmanni og var mér boðið í Þjóðleikhúskjallarann til að móttaka boðskapinn. Samkoman hófst með ræðuhöldum þar sem flokkurinn var mærður af krafti, en þar kom, að í ræðustól sté ungur maður sem taldi Framsóknarflokkinn hafa villst af leið og að nauðsyn bæri til að rétta af kúrsinn.

Málflutningur mannsins féll illa í kramið hjá fundarboðendum og gerðu þeir það sem þeir gátu til að stöðva manninn, hann var hins vegar ekki á því að hætta og hélt áfram þar til að slökkt hafði verið á hljómflutningstækjunum sem notuð voru til að koma boðskapnum á framfæri.

Þetta var á þeim tímum þegar Framsóknarflokkurinn gat talist ,,frjálslyndur“ miðað við ríkjandi tíðaranda, en síðan hefur margt breyst. Gírugir peningakóngar hafa ráðið ríkjum í flokknum og nú er svo komið að sonur eins vinsælasta leiðtoga flokksins gat ekki fundið sér ból í honum og bar því við að ástæðan væri skortur á víðsýni.

Ætli það þurfi frekar vitnana við: Bragð er að þá barnið finnur.